ئېچىلىۋاتىدۇ سەل ساقلاڭ
بۇ كونا بىر تېما سەۋەپلىك كېلىپ چىققان ھېكايە.
بىر كۈنى تۆت ئەر ئىشخانىدا ئولتۇرۇپ مۇنداق بىر مەسىلە ئۈستىدە تالىشىپ قاپتۇ : ئەگەر سىز، ئانىڭىز ، ئايالىڭىز ۋە ئوغلىڭىز تۆتىڭلار بىر كېمىگە ئولتۇرۇپ ، تۇيۇقسىز كېمە ئۆرۈلۈپ كەتسە ، ھەممىڭلار سۇغا چۈشۈپ كەتسەڭلار، سىزنىڭ پەقەت بىرلا ئادەمنى قۇتقۇزۇش ئىمكانىيىتىڭىز بولسا ، سىز ئەڭ ئالدى بىلەن كىمنى قۇتقۇزىسىز ؟
كۆپچىلىك ئۆز-ئارا مۇنازىرە قىلىشىپتۇ، بىرىنجى ئەر دەپتۇ : « مەن ئوغلۇمنى قۇتقۇزىمەن ، چۈنكى ئۇ تېخى كىچىك ، ھاياتلىق مۇساپىسى ئۇزۇن ، شۇڭا ئەڭ قۇتقۇزۇشقا تېگىشلىكى ئوغلۇم بولىدۇ » ؛ ئىككىنجى ئەر دەپتۇ : « ئايالىمنى قۇتقۇزىمەن ، ئوغلۇمغا كەلسەم ، ئايالىم ساق –سالامەت بولسىلا ، ئوغۇل دېگەن يەنە تېپىلىدۇ » ؛ ئۈچىنچىسى دەپتۇ : « كىم ماڭا ئەڭ يېقىن بولسا شۇنى قۇتقۇزىمەن ، جىددىي ئەھۋال ئەمەسمۇ ، ئويلىنىپ ئولتۇرغۇدەك ۋاقىت يوق » . تۆتىنجى ئادەم بەكمۇ يۇۋاش ئىكەن ، ئۇ دەماللىققا قانداق تاللاشنى بىلەلمەي قاپتۇ. ئۆيگە قايتقاندىن كېيىن ، ئايرىم-ئايرىم ئوغلى ، ئايالى ۋە ئانىسىدىن سوراپتۇ . ئوغلى پەرۋاسىزلا جاۋاب بېرىپتۇ : « بىزنىڭ بۇ يەردە دەريا بولمىسا ، قانداقسىگە سۇغا چۈشۈپ كەتكىدەكمىز ؟ مۇمكىن ئەمەس ! » ــــ كىچىك بالىلار مەسىللەرگە ھەمىشە يۈزەكىلا قارايدۇ ؛ ئايالى نارازى بولغان ھالدا دەپتۇ : « ئەلۋەتتە ئاۋال بىز ئانا-بالىنى قۇتقۇزىشىڭىز كېرەك » ــــ ئاياللار ھەمىشە ئېرىنى بەك قابىليەتلىك ، شۇڭا ھەممە مەسئۇلىيەتنى ئۈستىگە ئېلىشى كېرەك دەپ ئويلايدۇ ؛ ئەڭ ئاخىردا ئۇ يەنە بۇ مەسىلىنى ئانىسىدىن سوراپتۇ ، ئۇ گېپىنى تېخى دەپ بولالماستا ،ئانىسى ئۇنىڭ قولىنى چىڭ سىقىپ تۇرۇپ دەپتۇ : « بالام ، ئەگەر راستىنلا شۇنداق بولسا ، سەنمۇ سۇغا چۈشۈپ كەتمەمسەن ؟ مەن سېنى قۇتقۇزىمەن...» ئانىسىنىڭ جاۋابىنى ئاڭلاپ ئۇ ئېسەدەپ يىغلاپ كېتىپتۇ...
سىز بولسىڭىز كىمنى قۇتقۇزىسىز؟ بۇ مەسىلىنى ئادەم قانچە ئويلىغانسىرى شۇنچە بىئارام بولىدۇ ، بەلكىم سىزمۇ ھېكايىدىكى يۇۋاش ئادەمدەك قانداق تاللاشنى بىلمەي تېڭىرقاپ قالىسىز. لېكىن بۇ ھېكايىنى ئوقۇغاندىن كېيىن ، ئىشىنىمەنكى ، كۆڭلىڭىزدە نۇرغۇن نەرسىلەرنى چۈشىنىپ يەتتىڭىز.
