ꆈꌠꈎꏅ——ꆿꇁꍮꒌꆚꐧꆹꈲꒌꆣꌠꋊꃅꋩꑍ 彝历年——庆丰收祈福的节日

ꆈꌠꈎꏅ——ꆿꇁꍮꒌꆚꐧꆹꈲꒌꆣꌠꋊꃅꋩꑍ

ꁱ、ꍑ：ꀉꈌꏬꌋ

ꆈꌠꈎꏅꌠꆹꆈꌠꏓꂱꅿꋍꉎꀋꐥꃅꈣꒉꌠꋩꑍꉬ，ꉈꄡꇗꋍꈓꌠꈯꄔꈐꏭꋍꉎꀋꐥꃅꉌꇿꉌꌒꌠꃅꑍꃅꉖꑌꉬ。ꀃꌋꀊꆨꅑꅷꀋꃅꀃꑍꋋꄮꑟꇁꇬ，ꆈꌠꏓꂱꆹꈎꏅꌠꇬꉜꁨꐮꉜꁨ，ꉈꄡꇗꊿꋧꈩꌒꇈꏣꂿꑟꈨꌠꃅꑍꃅꉖꑌꉬ。ꆈꌠꈎꏅꌠꆹꃅꈎꋍꈓꌠꅿꌐꂫꅉꉬ ，ꃅꈎꀊꏀꋍꈓꌠꅿꀨꇬꀕꄑꈌꉬ，ꃅꆹꃅꏀꈯꄔꅿꄹꌐꊨꄅꅉꉬ。ꈎꀨꆪꀨꈎꏅꆪꆗꌌꊨꄅ，ꃅꍵꃅꎸꈧꌺꆧꌺꌌꊨꄅ。ꑮꑟꌕꉖꏟꇁꏈꅍꐥ，ꊿꀘꌕꉖꈩꇁꀜꅍꐥ，ꈎꏅꌕꉖꋠꇁꅝꅍꐥ。ꈎꏅꃄꌕꑍ，ꈩꃆꀜꃄꃮꑭꀊꉘꁵꑟꉬ，ꋠꃆꅝꃄꃮꌌꀿꃀꍇꑟꉬ，ꁵꃆꍈꃄꃮꇇꊈꌐꁵꑟꉬ；ꈎꏅꃄꌕꑍ，ꋠꃅꅝꌒꉾꃤꇇꁉꊬꑟꉬ，ꉌꃈꑓꌒꎧꏸꈌꂿꏽꑟꉬ。

ꉪꊈꆈꌠꌺꇖꆹꐯꇯꉌꈯꑓꈜꃅꏓꇁꃀꌠꀿꃀꈭꇍꄉ，ꊷꆣꀕꌠꑱꈐꇂꃴꄉꈀꄸꑌꌒꐨꊌꌐ。ꇯꍝꃅꉉꇬꆹ，ꏮꏑꌌꇁꀿꃀꈭꇍꄉꈎꏅꆪꆗꇬꆹ，ꀿꃀꏭꉌꌒꄀꌠꀉꄂꀋꉬꃅ，ꉈꑴꆏꉌꈯꑓꈜꃅꏮꏑꌊꀿꃀꑋꃅꎼꇁꌠꋚꑌꉘꁇꁉꌠꋠꌠꑌꉬꅊꇈ，ꀊꅰꃅꄚꄉꅉꀕꃅꉪꊇꆹꋌꌌꐧꇂꃰꊿꉂꏣꉂꑟꐝꍠꀕꇈꐙꎴꀕꌊꁌꇐꈤꋍꉎꀋꐥꌠꊌꌠꑌꉬꑴꌦ。ꆈꌠꈎꏅꆪꆗꌠꆹꈎꆹꎭꈎꏀꋩ、ꈎꏅꋬꂻ、ꆿꇁꍮꒌꆚ、ꐧꆹꈲꒌꆣ、ꋍꑷꌺꇖꏮꏑꏿꄉꐥꐨꐚꒉꌟꃅꐓꂿꀕꌠꊌꄮꇬꉬ，ꑍꌒꃆꇭꋩ，ꉖꌒꎧꏸꑵ，ꈌꌒꆿꍯꋠ，ꋊꌒꁍꑗꃼ，ꃤꌒꃆꇭꎹ，ꆫꌒꃄꉬꄀ。ꈎꏅꃅꌒꆹ，ꆿꇁꍮꒌꆚ；ꆀꃅꀕꌒꆹ，ꑌꇁꑾꒌꆚ，ꍞꉃꁨꇉꀕ，ꁍꊂꑗꎃꎔ，ꌊꋦꒊꌋꀕ；ꑮꑟꃅꌒꆹ，ꐧꆹꈲꒌꆣ；ꊈꊂꌐꎃꎔ，ꇱꃏꒊꋒꀕ；ꐯꏛꃅꌒꆹ，ꑭꊂꑣꒌꆚ，ꏸꊃꄂꈐꃅ，ꈬꊃꉘꎁꎔ，ꐚꏛꒊꋒꀕ，ꎭꈓꁨꇉꀕ，ꈐꉘꁦꌺꒊ，ꍩꅥꇇꀙꌌ，ꌅꎆꃱꊂꆫ，ꅂꐎꀕꊂꅂ。

ꈎꏅꀉꁌꁧꏸꌐꈭꐨꆏ，ꆈꌠꈎꏅꆪꆗꌠꆹꌐꌠꉬꀐ，ꆀꃅꆈꌠꌺꇖꈨꌠꆹꈎꏅꃮꎸꀵꏮꇴꎭꁧꇬꑌꄡꇗꏦꃤꐥꑵ，ꂴꆽꆹꀉꁌꀉꂵ、ꀉꄉꀉꂿꅍꎭꁧꑵ，ꊁꑲꆀꀀꁈꀀꃀ、ꀑꑌꀑꀦ、ꃀꑌꀿꃶꑠꅍꎭꁧꑵ，ꑠꅹꆈꌠꈎꏅꃮꎸꆹꃏꏸꑌ、ꉺꍯꑌ、ꐕꍯꑌꌊꆀꇁꉷꃅꀋꑟꅉꀋꐥꑠꑵꉬ。ꈎꏅꏮꇴꎭꁧꌠꆹꆈꌠꈎꏅꈭꐨꈌꆹꂿꉘꀵꇁꀒꋏꀿꃀꍈ，ꀒꋏꀿꃀꁌꒉꌠꏓꇁꐯꇯꌠꆀꃅꆈꌠꋊꃅꉾꃪꌠꃅꇏꂶꄟꉬ，ꋋꆹꆈꌠꏓꂱꋠꇐꅝꒉꁱꀕꅿꀋꉬꀋꉆꌠꏓꇱꈿꐋꋍꈨꉬꑴ，ꋋꆹꉂꏣꌧꐮꈴꌠꅿꈉꐨꉬ，ꀉꅰꃅꃀꌠꁌꒉꊂꋊꉁꅉꌠꅿꋊꃅꉾꃪꌠꇗꀹꑌꉬ。

ꀃꌋꀊꆨꅑꅷꀃꑍꑟꇁꇬ，ꆀꃅꆈꌠꆹꈍꄮꑌꆿꂄꍯꌵꏅ，ꑌꑿꀹꎆꏅ，ꊿꇬꋬꂻꏅꅷꇁꇬꎷꑠꁯꉬ，ꋬꂻꋬꂻꆀꃅꆈꌠꋬꂻꆏꈎꏅ，ꈎꏅꋬꂻꇈꇿꑌꄂꅑꆳꀋꁏꌐ，ꆀꃅꆈꌠꈎꏅꌠꁱꀕꈏꐊꊋꑌꄡꇗꑠꃅꄉꋍꋏꇈꋍꋏꃅꉪꊇꌌꇁꂘꑴꊪꊛꏿꅷꀃꑍꋋꄮꑟꇁꌠꉬꅊꇈ。