يېمەك-ئىچمەكنى ياخشىلاش ۋە چېنىقىشنى كۈچەيتىش ھەممە ئېتىراپ قىلىدىغان ئۈنۈملۈك يۈرەك ئاسراش ئۇسۇلى. ئەمما، ئامېرىكا تاراتقۇلىرىنىڭ خەۋىرىگە قارىغاندا، بارغانسېرى كۆپ تەتقىقاتلاردا يېمەك-ئىچمەك، ھەرىكەت قىلىشتىن باشقا، يەنە نۇرغۇن كىچىك ئامىللارنىڭ يۈرەك ساغلاملىقىنى ئاسراش رولى بارلىقى كۆرسىتىلگەن.
1. قۇچاقلىشىش. تەتقىقاتلاردا كۆرسىتىلىشىچە، سۆيگۈنى بىلەن قۇچاقلىشىش بەدەندە قان بېسىمىنى تۆۋەنلىتىشكە ياردەم بېرىدىغان، بېسىمنى يەڭگىللىتىدىغان بىر خىل ھورمۇن ـــ ئوكسىتوتسىن قويۇپ بېرىدىكەن.
2. قاقاقلاپ كۈلۈش. قاقاقلاپ كۈلۈش قان، تومۇرلارنىڭ كېڭىيىشىنى غىدىقلاپ، ئەڭ كۆپ بولغاندا %22كە يېتىدىكەن، قان ئايلىنىشنى كۈچەيتىپ، قان بېسىمىنى تۆۋەنلىتىدىكەن.
3. شاكىلات يېيىش. كاكائو پۇرچىقى تەركىبىدىكى مول ئوكسىدلىنىشقا قارشى ماددا ئىممۇنىتېت سىستېمىسىنىڭ ئىقتىدارىنى كۈچەيتىپ، بەدەننىڭ سىرتتىن كەلگەن زەخمىگە قارشى تۇرۇشىغا ياردەم بېرىدىكەن.
4. ئەرمەك ھايۋان بېقىش. سانلىق مەلۇماتلاردا كۆرسىتىلىشىچە، ئەرمەك ھايۋان باققان كىشىلەرنىڭ قان بېسىمى بىر قەدەر تۆۋەن بولۇپ، يۈرەك كېسىلىگە گىرىپتار بولۇش خەۋپىمۇ ئەرمەك ھايۋان باقمايدىغان كىشىلەرنىڭكىدىن تۆۋەن بولىدىكەن. بۇ بەلكىم ئەرمەك ھايۋان باقىدىغان كىشىلەرنىڭ ئەرمەك ھايۋان باقمايدىغان كىشىلەرگە قارىغاندا ئۇزاق ھەرىكەت قىلىدىغانلىقىدىن بولۇشى مۇمكىن ئىكەن.
5. ھەپتىدە بىر كۈن گۆشسىز تاماق يېيىش. گۆشنى ئاز يېيىش يۈرەك ئاسراشتىكى مۇھىم تەدبىرلەرنىڭ بىرى، تەتقىقاتلاردا كۆرسىتىلىشىچە، مۇۋاپىق مىقداردا گۆشسىز تاماق يېگەندە يۈرەك كېسىلى بولۇش خەۋپىنى %32 تۆۋەنلەتكىلى بولىدىكەن، شۇڭا ھەر ھەپتىدە ئاز بولغاندا بىر كۈن گۆشسىز تاماق يېيىش تەۋسىيە قىلىنىدىكەن.
6. تۇرۇش. مەيلى خىزمەت قىلايلى ياكى ئارام ئالايلى، بىر كۈندە كۆپىنچە ۋاقىتلاردا ئولتۇرىمىز، بۇ، يۈرەك كېسىلىگە گىرىپتار بولۇش خەۋپىنى بەلگىلىك دەرىجىدە ئېغىرلاشتۇرۇۋېتىدۇ. ئورنىمىزدىن تۇرۇپ، ئىشخانىدا بىر ئاز مېڭىش، ياكى نەچچە سائەتتە بىر مېڭىپ بېرىش يۈرەك ساغلاملىقىنى ياخشىلايدۇ.
7. مۇۋاپىق ئۇخلاش ۋاقتىنى ساقلاش. ھەر كۈنى كەچتە 7 ~8 سائەت ئۇخلاشقا كاپالەتلىك قىلىش كېرەك. تەتقىقاتلاردا كۆرسىتىلىشىچە، بەك ئاز ئۇخلىغاندا يۈرەك كېسىلىگە گىرىپتار بولۇش نىسبىتى %48 ئاشىدىكەن، ھالبۇكى بەك كۆپ ئۇخلىۋەتسىمۇ، يۈرەك كېسىلىگە گىرىپتار بولۇش نىسبىتى %38 ئاشىدىكەن.
8.كوففېئىن. ھەر كۈنى 1~3 ئىستاكانغىچە قارا قەھۋە ئىچسە، يۈرەك رېتىمىنى مۇقىملاشتۇرۇشقا پايدىسى بار.
9.شاۋقۇن-سۈرەنلىك تاشيولدىن يىراق تۇرۇش. تەتقىقاتلاردا كۆرسىتىلىشىچە، يۇقىرى سۈرئەتلىك تاشيولدا، سىز ئۇچراشقان شاۋقۇن ھەر 10 دېتسىبېل يۇقىرى كۆتۈرۈلسە، يۈرەك كېسىلىگە گىرىپتار بولۇش خەۋپى %12 يۇقىرى كۆتۈرۈلىدىكەن.
10.ئۆيلىنىش. تەتقىقاتلاردا بايقىلىشىچە، ئۆيلىنىپ بولغانلارنىڭ يۈرىكى بويتاقلارنىڭكىگە قارىغاندا تېخىمۇ ساغلام بولىدىكەن. توي قىلىپ بولغان ئاياللارغا نىسبەتەن 10 يىل داۋاملاشقان مۇقىم تۇرمۇش يۈرەك-قان تومۇر كېسەللىكلىرىگە گىرىپتار بولۇش خەۋپىنى %13 تۆۋەنلىتىدىكەن.
خەلق تورىدىن تەرجىمە قىلىندى.
dastur