ئېلون ماسك: كىرىمىنىي پولات پالۋىنى- 大数跨境

Nepkar

2020-10-17

导读：ياخشى كۈنلەر دائىم ئەستە ساقلىنىدۇ، ئەمما كېيىنكى يامان كۈنلەر ئۇنتۇلۇپ قالدى، بۇ ئازراقمۇ غەلىتە ئە

تەۋسىيە 1	ماختاشلار	كىرىش سۆز
تەۋسىيە 4	تەۋسىيە 3	تەۋسىيە 2
1-باب 1-بۆلەك	تەۋسىيە 6	تەۋسىيە 5

ئەسكەرتىش:

ئەگەر ئېلون ماسك ۋە تېسلا توغرىسىدا تېخىمۇ كۆپ يازمىلارغا ئېرىشمەكچى بولسىڭىز بۇ يەرنى بېسىڭ!

2012-يىلى، مەن ئۆزۈم ماسكنى زىيارەت قىلىپ، ئۇنىڭ زادى قانداق ئادەم ئىكەنلىكىنى كۆرۈپ بېقىشنى قارار قىلدىم ھەمدە «بلۇمبېرگ سودا ھەپتىلىك ژۇرنىلى»نىڭ مۇقاۋىسىغا ئۇنىڭغا مۇناسىۋەتلىك خەۋەر يازدىم. ئۇ چاغدا ماسكنىڭ تۇرمۇشىدىن ئۇنىڭ سادىق ياردەمچىسى مارى بېز بروۋن (Mary Beth Brown) خەۋەر ئالاتتى. ئۇ مېنى «ماسك زېمىنى (Musk Land)» دەپ ئاتىلىدىغان جاينى ئېكسكۇرسىيە قىلىشقا تەكلىپ قىلدى. «ماسك زېمىنى»غا بارغان بارلىق كىشىلەرنىڭ ساراڭ بولۇپ قالغانلىقىغا ئىشىنىمەن. ئۇلار سىزگە ماشىنىنى خوسان شەھىرى راكېتا چوڭ يولى 1-نومۇر (One Rocket Road)دىكى SpaceX تۇرۇشلۇق جايغا توختىتىشنى ئېيتىدۇ. خوسان ئولتۇراقلىشىشقا ماس كېلىدىغان شەھەر ئەمەس، ئۇ لوس ئانژېلېسنىڭ قاقاس شەھەر ئەتراپىغا جايلاشقان. قاتار-قاتار ۋەيران بولغان ئۆيلەر، دۇكانلار ۋە ئاشخانىلار چوڭ تىپتىكى سانائەت رايونلىرى تەرىپىدىن قورشىۋېلىنغان بولۇپ، بۇ سانائەت رايونلىرى قارىماققا زېرىكىشلىك تىك تۆت تەرەپلىك قۇرۇلۇش دولقۇنى مەزگىلىدىن قېلىپ قالغاندەك كۆرۈنەتتى. ئەجىبا ماسك راستىنلا شىركىتىنى خارابىلىكنىڭ ئوتتۇرىسىغا تەسىس قىلغانمىدۇ؟ SpaceX نىڭ ئاساسىي قۇرۇلۇشىنى كۆرگەن چېغىڭىزدىلا، ئاندىن بۇ گەپنىڭ ئەقىلگە مۇۋاپىق كېلىدىغانلىقىنى ھېس قىلىسىز. بۇ 550 مىڭ كىۋادرات فۇت كېلىدىغان تىك تۆت بۇلۇڭ شەكىللىك قۇرۇلۇش بولۇپ، «تەن، روھ ۋە ئىدىيە بىرلىكى»نىڭ سىمۋولى بولغان ئاق رەڭ بىلەن سىرلانغان.

پەقەت سىز SpaceX نىڭ باش ئىشتابىنىڭ ئالدى ئىشىكىدىن ئۆتكەندىلا، ئاندىن بۇ ئەرنىڭ قىلغان ئىشىنىڭ نەقەدەر ئۇلۇغ ئىكەنلىكىنى ھېس قىلالايسىز. ماسك لوس ئانژېلېسنىڭ مەركىزىدە (بۇ يەردە دېيىلگىنى لوس ئانژېلىس ۋىلايىتى، لوس ئانژېلېس شەھىرى ۋە خوسان شەھىرى لوس ئانژېلىس ۋىلايىتىگە تەۋە) راكېتا زاۋۇتى قۇرغان. بۇ زاۋۇت بىر قېتىمدا بىرلا راكېتا ياسىمايدۇ، بەلكى بىرلا ۋاقىتتا نۇرغۇن راكېتا ياسايدۇ، ھەر بىرى يوقلۇقتىن بارلىققا كېلىدۇ. بۇ زاۋۇت غايەت زور بىر گەۋدىلەشتۈرۈلگەن بوشلۇق، ئۇنىڭ ئارقا تەرىپى غايەت زور قاچىلاش-چۈشۈرۈش مەيدانى بولۇپ، توشۇپ كېلىنگەن چوڭ مېتال ماتېرىياللارنى قوبۇل قىلىشقا ئىشلىتىلىدۇ. بۇ مېتال ماتېرىياللار كېيىن ئىككى قەۋەتلىك كەپشەرلەش ئۈسكۈنىسىنىڭ يېنىغا ئاپىرىلىپ پىششىقلاپ ئىشلىنىدۇ. زاۋۇتنىڭ ھەممىلا يېرىدە ئاق رەڭلىك چاپان كىيىۋالغان تېخنىك خادىملارنى ئۇچراتقىلى بولىدۇ، ئۇلار ئاساسىي تاختا، سىمسىز تېلېگراف ۋە باشقا ئېلېكتىرونلۇق زاپچاسلارنى ئىشلەپچىقىرىدۇ؛ بىر ئالاھىدە ھىم ئېتىلگەن ئەينەك بوشلۇقتا، يەنە بىر توپ كىشىلەر خەلقئارا ئالەم بوشلۇقى پونكىتىغا ئېلىپ بېرىلىدىغان ئالەم بوشلۇقى بۆلۈمچىسىنى ياسايدۇ؛ ياغلىق ئارتىۋالغان، بەدىنىگە گۈل چېكىلگەن ئەرلەر ۋان ھالېن مۇزىكا ئەترىتى (Van Halen)نىڭ تولغانما ئۇسسۇل مۇزىكىسىنى ئاڭلىغاچ، راكېتا ماتورىغا توك سىمى ئورنىتىدۇ. قۇراشتۇرۇلۇپ بولغان راكېتا زاپچاسلىرى بىر قاتار قىلىپ تىزىلىپ، يۈك ئاپتوموبىللىرىنىڭ قاچىلاپ توشۇشىنى كۈتىدۇ. زاۋۇتنىڭ يەنە بىر تەرىپىدە يەنە نۇرغۇن راكېتا بار بولۇپ، ئىشچىلارنىڭ ئۇلارغا ئاق سىر پۈركۈشىنى كۈتىدۇ. بىر قېتىمدا پۈتۈن زاۋۇتنى ئايلىنىپ بولۇش ناھايىتى تەس، بىر قاراپلا نەچچە يۈز ئىشچىنىڭ ھەر خىل غەلىتە شەكىلدىكى ماشىنىلارنى چۆرىدەپ ئوخشاش ھەرىكەت قىلىۋاتقانلىقىنى كۆرگىلى بولىدۇ.

بۇ يەر پەقەت «ماسىك زېمىنى»دىكى تۇنجى بىنا بولۇپ، SpaceX بوئېن (Boeing) شىركىتىنىڭ قىسمەن بىنالىرىنى سېتىۋالغان. ئىلگىرى بۇ يەر ئاساسلىقى بوئېن 747 تىپلىق يولۇچىلار ئايرۇپىلانىنىڭ گەۋدىسىنى ئىشلەپچىقىرىشقا ئىشلىتىلەتتى. بۇنىڭ ئىچىدىكى بىر بىنانىڭ ئۆگزىسى ياي شەكلىدە بولۇپ، قارىماققا بىر ئايروپىلان ئىسكىلاتىغا ئوخشايدۇ، ئۇ تېسلانىڭ تەتقىقات ۋە لايىھەلەش مەركىزى. تېسلا Model S تىپلىق ئاپتوموبىل ۋە كېيىنكى Model X تىپلىق ھەشەمەتلىك توكلۇق SUV نىڭ تاشقى كۆرۈنۈش لايىھەسى مۇشۇ يەردىن چىققان. تېسلا لايىھەلەش مەركىزىدىكى ئاپتوموبىل توختىتىش مەيدانىغا بىر توك قاچىلاش پونكىتى قۇرۇپ، ئاپتوموبىل ئىگىلىرىنىڭ بۇ يەردە ھەقسىز توك قاچىلىشىغا تەمىنلىگەن. بۇ توك قاچىلاش پونكىتى كۆزگە ئالاھىدە چېلىقىپ تۇرىدۇ، چۈنكى ماسك بۇ يەرگە قىزىل ۋە ئاق رەڭلەر ئارىلاشقان تېسلا بەلگىسى چۈشۈرۈلگەن چاسا ئۇچلۇق ئابىدە ئورناتقان بولۇپ، بۇ چاسا ئۇچلۇق ئابىدە كەڭ سۇ كۆلچىكىنىڭ مەركىزىگە ياسالغان. لايىھەلەش مەركىزىدە، مەن ماسكنى تۇنجى قېتىم زىيارەت قىلدىم، بۇ قېتىمقى زىيارەت ماڭا ئۇنىڭ سۆزلىشىش ۋە ئىش قىلىش ئۇسلۇبىنى ئاستا-ئاستا ھېس قىلدۇردى. ئۇ ئۆزىگە ئىشىنىدىغان ئادەم، لېكىن ھەمىشە نامايان قىلىپ بېرەلمەيدۇ. ئەمدىلا ئالاقە قىلىشقا باشلىغاندا، ماسك ھەمىشە سەل خىجىلچان بولۇپ، ئانچە تەبىئىي كۆرۈنمەيتتى. گەرچە ئۇنىڭ جەنۇبىي ئافرىقا تەلەپپۇزى ئۇنچە قويۇق بولمىسىمۇ، لېكىن يەنىلا ھېس قىلغىلى بولاتتى، بۇ ماسكنىڭ جانسىز سۆھبەت ئۇسلۇبىنى سۇسلاشتۇرالمايدۇ. نۇرغۇن ئىنژېنېر ياكى فىزىكا ئالىملىرىغا ئوخشاش، ماسك توغرا سۆزلەرنى ئىشلىتىش ئۈچۈن، ھەمىشە بىردەم توختاپ قالىدۇ؛ بەزىدە ئۇ تۇيۇقسىز مەلۇم بىر چوڭقۇر ئىلىم-پەن ساھەسى ئۈستىدە پاراڭلىشىپ قالىدۇ، لېكىن سىزگە قىسقىچە چۈشەندۈرۈپ قويمايدۇ. ماسك ھەمىشە سىزنىڭ ئۇنىڭ دېگەن مەزمۇنىنى چۈشىنىشىڭىزنى ئۈمىد قىلىدۇ. بۇلارنىڭ ھەممىسى ئادەمنى بىئارام قىلمايدۇ. ئەمەلىيەتتە، ماسك دائىم نۇرغۇن يۇمۇرلارنى ئېيتىپ، كىشىلەرگە ئۇنىڭ ئىنتايىن سېھرىي كۈچكە ئىگە ئىكەنلىكىنى ھېس قىلدۇرىدۇ. ئەمما مەن ئۇنىڭ بارلىق سۆزلىرىنىڭ كۈچلۈك مەقسەتچانلىققا ئىگە ئىكەنلىكىنى ھېس قىلالايمەن ھەم ئۇنىڭ بىلەن سۆھبەتلەشكەن تەرەپكە بېسىم ھېس قىلدۇرىدۇ. ماسك ئەزەلدىن سىزگە قۇرۇق گەپ قىلمايدۇ. (مەن توپتوغرا 30 سائەت زىيارەت قىلىپ ئاندىن ماسكنى ئۈزۈل-كېسىل ئارام ئالدۇردۇم، ئۇنىڭ باشقىلارغا ئوخشىمايدىغان، تېخىمۇ چوڭقۇر قاتلاملىق روھى ۋە كىشىلىك دۇنياسىنى چۈشەندىم).

كۆپ ساندىكى داڭلىق CEO لارنى ھەمىشە ھەر خىل ياردەمچىلەر ئوراپ تۇرىدۇ. ئەمما ماسك كۆپ قىسىم ۋاقتىنى «ماسك زېمىنى»دا ئۆزى قول تىقىپ ئىشلەش بىلەن ئۆتكۈزىدۇ. ئۇ بەك چوڭ گەپ قىلىدۇ، نوپۇزىنى كۆرسىتىپ ئەتراپقا نەزەر تاشلايدۇ. ماسك مەن بىلەن پاراڭلاشقاچ لايىھەلەش ئىشخانىسىغا بېرىپ، زاپچاس ۋە ئاپتوموبىل ئەۋرىشكىلىرىنى تەكشۈرۈشكە باشلىدى. مەيلى قەيەرگە بارايلى، خىزمەتچىلەر ماسكنىڭ ئالدىغا بېرىپ نۇرغۇن ئۇچۇرلارنى دوكلات قىلىدۇ. ئۇ كۆڭۈل قويۇپ ئاڭلايدۇ ۋە تەپەككۇر قىلىدۇ ھەمدە رازى بولغاندا بېشىنى لىڭشىتىدۇ، ئاندىن كېيىنكى خىزمەتچىنىڭ دوكلاتىنى ئاڭلايدۇ.

بىر قېتىم، تېسلانىڭ لايىھە باش نازارەتچىسى فرانز ۋون خولزخاۋسېن (Franz von Holzhausen) ماسكنىڭ Model S تىپلىق ئاپتوموبىلنىڭ يېڭى چاقى ۋە چاق بۇلى، شۇنداقلا Model X تىپلىق SUV (تەنھەرىكەت تىپىدىكى كۆپ ئىقتىدارلىق ئاپتوموبىل)نىڭ ئورۇندۇق ئورۇنلاشتۇرۇشىغا بولغان قارىشىنى چۈشىنىشنى ئۈمىد قىلاتتىكەن، سۆھبەتتىن كېيىن، ئۇلار بىللە كەينىدىكى ئۆيگە كىردى، بىر يۇقىرى دەرىجىلىك چېرتيوژ سىزىش كومپيۇتېر سېتىش شىركىتىنىڭ يۇقىرى دەرىجىلىك باشقۇرغۇچىلىرى شۇ يەردە ماسكنى ساقلاۋاتاتتى. بۇ يۇقىرى دەرىجىلىك باشقۇرغۇچىلار ماسك ئۈچۈن بىر مەھسۇلات كۆرسەتمىسى تەييارلىغان ئىكەن. ئۇلار ئۆزىچە پەخىرلىنىدىغان 3D (ئۈچ ئۆلچەملىك) كۆپتۈرۈش تېخنىكىسىنى نامايەن قىلدى. بۇ تېخنىكىدا تېسلا مەۋھۇم Model S مودېلىنى تەڭشەش ئارقىلىق نۇرغۇن تەپسىلاتلارنى كۆرەلەيدۇ، مەسىلەن سايە ۋە يول چىرىغىنىڭ ئاپتوموبىلغا ئۇرۇلغاندىكى ئۈنۈمى. تېسلانىڭ ئىنژېنېرىنىڭ بۇ سىستېمىنى بەكلا ئالغۇسى بار، لېكىن ماسكنىڭ تەستىقىدىن ئۆتۈشى كېرەك. بۇرغىلاش ئىستانوكى ۋە سانائەت شامالدۇرغۇچىنىڭ غايەت زور شاۋقۇنىغا ئەگىشىپ، ھېلىقى بىر قانچە يۇقىرى دەرىجىلىك باشقۇرغۇچى ماسىكقا كۈچىنىڭ يېتىشىچە چۈشەندۈرۈشكە باشلىدى. ئەينى چاغدا ماسك ئۆزىنىڭ خىزمەت ئۆلچىمى بويىچە خۇرۇم ئاياغ، لايىھەلىگۈچىنىڭ پادىچىلار ئىشتىنى ۋە قارا رەڭلىك مايكىسىنى كىيىۋالغان بولۇپ، يەنە كۆرسىتىشنى كۆرگەندە ئىشلىتىدىغان 3D كۆزەينەك تاقىۋالغانىدى. لېكىن ئۇ بۇنىڭ ئۈچۈن قىلچە تەسىرلەنمىگەندەك قىلىدۇ. ئۇ قارشى تەرەپكە ئويلىشىپ باقىدىغانلىقىنى ئېيتتى. ئاندىن تېز قەدەم بىلەن ئەڭ چوڭ شاۋقۇن مەنبەسى-لايىھەلەش ئىشخانىسىنىڭ ئەڭ ئىچىدىكى بىر سېخقا قاراپ ماڭدى. تېسلانىڭ ئىنژېنېرى ئۇ يەرگە توك قاچىلاش پونكىتىنىڭ سىرتىغا قويۇلىدىغان ئۇل جازىنى ياساۋاتقان بولۇپ، بۇ مۇنارنى بېزەشكە ئىشلىتىلىدىغان ئۇل جازىنىڭ ئېگىزلىكى 30 ئىنگلىز چىسىغا يېتىدىكەن. «ئۇ نەرسە قارىماققا 5 بال قارا بورانغىمۇ ئامال قىلالمايدىغاندەك قىلىدۇ.» دېدى ماسك «ئۇنى نېپىزرەك قىلىڭ.» دەپلا، ئاخىرى مەن بىلەن ئۇنىڭ قارا رەڭلىك Model S ماشىنىسىغا ئولتۇردى، ئەگرى-بۈگرى تاشيولنى بويلاپ SpaceX نىڭ باش ئىشتاب بىناسىغا قايتىپ كەلدى. «مەن تېخى "ھازىر نۇرغۇن ئەقىللىق كىشىلەر ئىنتېرنېت، پۇل مۇئامىلە ۋە قانۇنغا كۈچ چىقىرىۋاتىدۇ." دەپ ئويلاپتىمەن.» دېدى ماسك يولدا كېتىۋېتىپ «بۇ بىزنىڭ تېخىمۇ كۆپ يېڭىلىق يارىتىشنى كۆرەلمىگەنلىكىمىزنىڭ قىسمەن سەۋەبى.»

«ماسك زېمىنى» ئىلھامى

مەن 2000-يىلى كىرىمنىي جىلغىسىغا كېلىپ، ئاخىرىدا سان فىرانسىسكودىكى جىنايەت ئۆتكۈزۈش نىسبىتى يۇقىرى بولغان رايوندا ئولتۇراقلىشىپ قالغان. يەرلىك كىشىلەر سىزنى ئامال بار بۇ رايوندىن ئۆزىڭىزنى چەتكە ئېلىشقا ئاگاھلاندۇرىدۇ. سىز ھەممىلا يەردە توختىتىپ قويۇلغان ئىككى ماشىنىنىڭ ئوتتۇرىسىدا خالىغان يەرگە چوڭ-كىچىك تەرەت قىلىپ يۈرگەنلەرنى ياكى نېرۋىسى قالايمىقانلىشىپ كەتكەن كىشىلەرنىڭ كاللىسىنى بېكەت تاختىسىغا كۈچەپ ئۇرۇۋاتقانلىقىنى كۆرىسىز. شۇ جايدىكى «كىيىم سېلىش ئۇسسۇلى» كۇلۇبى ئەتراپىدىكى قاۋاقخانىدا، غەلىتە كىيىنگەن كىشىلەر قىزىقىش ئىچىدە كاستۇم-بۇرۇلكا كىيگەن سودىگەرلەرگە چاقچاق قىلىشاتتى؛ ۋۇجۇدىنى مەينەتچىلىك قاپلاپ كەتكەن مەستلەر سافادا مەست بولۇپ يېتىپ قېلىشقان، بۇ «ھورۇنلۇق ھەپتىلىكى»دىكى دائىم كۆرۈلىدىغان كۆرۈنۈش ئىدى. سان فىرانسىسكو بۇ يەرنىڭ جاپالىق ۋە رەھىمسىز تەرىپىنى نامايان قىلىپ، ئۇنى ئىنتېرنېت تورى ئارزۇ ئوتىنىڭ ئۆچۈشىنى كۆرۈشتىكى ئەڭ ياخشى سورۇنغا ئايلاندۇرغان.

سان فىرانسىسكو ئۇزۇندىن بۇيان ئاچكۆزلۈك بىلەن زىچ مۇناسىۋەتلىك بولۇپ كەلدى. ئۇ ئالتۇن قېزىش قىزغىنلىقىنىڭ ئارقىسىدا ۋەزىيەت ئېھتىياجى بىلەن بارلىققا كەلگەن بىر شەھەر، ھەتتا ئاپەت خاراكتېرلىك يەر تەۋرەشمۇ سان فىرانسىسكونىڭ ئىقتىسادىي تەرەققىيات ئىستىكىنى ئۇزاققىچە بېسىپ تۇرالمىدى. بۇ يەردىكى ھىپپى ھىدى سىزنى ئالداپ كەتمىسۇن، گۈللىنىش بىلەن كاساتلىشىشنىڭ ئالمىشىشى بۇ يەرنىڭ رېتىمى.

2000-يىلى، سان فىرانسىسكونىڭ ئىقتىسادى مىسلىسىز گۈللەنگەن، شۇنىڭ بىلەن بىر ۋاقىتتا ئاچكۆزلۈك تەرىپىدىن يۇتۇۋېلىنغان. بۇ بىر بۆلەك كەڭ خەلق خىيال ئىچىدە ياشايدىغان گۈزەل چاغلار ئىدى، يەنى تەلۋىلەشكەن ئالاقە تورى ئادەمنى تېز بېيىتىدىغان ۋاقىتلار ئىدى. بۇ غايىبانە كۆرۈنۈش قويۇپ بەرگەن ئىمپۇلس ئېنېرگىيەسى ناھايىتى روشەن. ئۇ توختىماي غوڭۇلدىغان ئاۋاز چىقىرىپ، پۈتۈن شەھەرنى تەۋرىتىۋېتىدۇ. مۇشۇ پەيتتە، مەن سان فىرانسىسكودىكى ئەڭ چۈشكۈن مەركىزىي جايدا، ئۇنىڭغا چوڭقۇر پېتىپ قالغان كىشىلەرنىڭ داۋالغۇپ تۇرغان كىشىلىك ھاياتىنى كۆزىتىۋاتىمەن.

ئۇ چاغدا ئەسەبىي سودا ھېكايىلىرى ماڭدامدا بىر ئۇچراپ تۇراتتى. تۈزۈكرەك، باشقىلار سېتىۋالماقچى بولغان مەھسۇلاتلارنى ئىشلەپ چىقىرىشنىڭ ھاجىتى يوق، سىز پەقەت ئىنتېرنېتقا مۇناسىۋەتلىك بىر پىلان تېپىپ، جاھانغا جاكارلىسىڭىزلا، تەجرىبىڭىزگە پۇل چىقىرىشقا تەقەززا بولىدىغان مەبلەغ سالغۇچىلار چىقاتتى، ئاندىن جۇش ئۇرۇپ راۋاجلىنىۋاتقان شىركەتتىن بىرنى قۇرۇپ چىققىلى بولاتتى. بىردىنبىر نىشان ئەڭ قىسقا ۋاقىت ئىچىدە ئىمكانقەدەر كۆپرەك پۇل تېپىش، بەلكىم ھېچ بولمىغاندا يوشۇرۇن ئېڭىدا، ھەممە ئادەم رېئاللىقنىڭ ئاخىرى بەربات بولىدىغانلىقىغا ئىشىنىشى مۇمكىن.

كىرىمنىي جىلغىسىدىكى كىشىلەر تىرىشىپ ئىشلەش، تىرىشىپ ئويناش دېگەندەك كونا مۇقاملارغا ئىنتايىن ئىشىنىدۇ. كىشىلەر 20، 30، 40، 50 ياش باسقۇچىدا كېچىنى تاڭغا ئۇلاپ خىزمەت قىلىدۇ. ئىشخانا يېنىدىكى ياتاقلار ۋاقىتلىق ئۆيگە ئايلىنىپ قالىدۇ، بۇ يەردە ھەتتا شەخسىي تازىلىققا ئەھمىيەت بېرىلمەيدىغان بولۇپ قالدى. غەلىتە يېرى شۇكى، ئەمەلىي ھاسىلات بولمىسىمۇ، نۇرغۇن خىزمەتلەر ئىشلىنەتتى؛ لېكىن ئارام ئالىدىغان ۋاقىت كەلگەندە، نۇرغۇن ئۇسۇللار ئارقىلىق ئۆز مەيلىگە قويۇپ بېرىلەتتى. ئەينى چاغدىكى قىزىق نۇقتا شۇكى شىركەتلەر ۋە تاراتقۇلارنىڭ ھەممىسى ئۆزئارا كىمنىڭ ئولتۇرۇشىنىڭ (party) تېخىمۇ مودا ئىكەنلىكىنى سېلىشتۇرىدىغان ھالەت شەكىللىنىپ، بىر يامان سۈپەتلىك ئايلىنىشقا پېتىپ قالغان ئىدى. سەپتىن چۈشۈپ قېلىشنى خالىمايدىغان ئەنئەنىۋى شىركەتلەرمۇ دائىم ناخشا كېچىلىكى ئۆتكۈزۈلىدىغان مەيداننى ئىجارىگە ئېلىپ يىغىلىش ئۆتكۈزۈپ، بىر قىسىم ئۇسسۇلچىلار، سېرك ئارتىسلىرى ۋە ئوچۇق كىيىنگەن قىزلارنى تەكلىپ قىلىپ، ھاراقنى ئۈزۈلدۈرمەي تەمىنلەيتتى. ياش ئىنژېنېرلار كولا ئارىلاشتۇرۇلغان ھەقسىز ۋىسكى ئىچەتتى ياكى ھاجەتخانىغا مۆكۈۋېلىپ كوكائىن چېكەتتى. ئاچكۆزلۈك ۋە شەخسىيەتچىلىك ئەينى چاغدىكى بىردىنبىر مۇۋاپىق تاللاش ئىدى.

ياخشى كۈنلەر دائىم ئەستە ساقلىنىدۇ، ئەمما كېيىنكى يامان كۈنلەر ئۇنتۇلۇپ قالدى، بۇ ئازراقمۇ غەلىتە ئەمەس. ئەقىلگە مۇۋاپىق بولمىغان گۈللىنىشنى ئەسلەش-قالدۇرۇپ كەتمەكچى بولغان لاققا-لۇققىلاردىن كۆپ قىزىقارلىق.

تارىخ بېتىدىن ئورۇن ئالغان بۇ بىر مەيدان ئالاقە تورى ئارقىلىق بېيىش خام خىيالى بەربات بولۇپ، سان فىرانسىسكو بىلەن كىرىمنىي جىلغىسىنى چوڭقۇر پەسكويغا چۈشۈرۈپ قويدى. پۈتمەس-تۈگىمەس يىغىلىش ئاخىرلاشتى. پاھىشە ئاياللار ئەمدى ئەتىگەن سائەت ئالتىدىلا تېندېرلوئىن رايونىدىكى كوچىدا لاغايلاپ يۈرۈپ، ئىشقا چىقىشتىن بۇرۇنقى جىنسىي مۇلازىمەت بىلەن تەمىنلەيدۇ. (تېز كېلىڭ، قوزام، ئۇ قەھۋەدىنمۇ بەكرەك روھلاندۇرىدۇ.). كىيىم-كېچەكلىرى ئوچۇق قىزلار يوقاپ كەتتى، ئۇنىڭ ئورنىغا كۆرگەزمە قىلىپ سېتىش يەرمەنكىسى ئۆتكۈزۈلدى، ئاندا-ساندا نېل دايموند (Neil Diamond)نىڭ مۇزىكا ئەترىتى قايتا كۆزگە چېلىقىدىغان بولدى، كىشىلەر بۇ يەردىن ھەقسىز مايكىغا ئېرىشەلەيدۇ ھەمدە سەل خىجىل بولۇشىدۇ.

پەن-تېخنىكا كەسپى بىر مەھەل تەمتىرەپ قالدى. ئالاقە تورى كۆپۈكى بەربات بولغاندىن كېيىن، ئاشۇ ئەخمىقانە خەۋپ-خەتەرگە مەبلەغ سالغۇچىلار ئۆزىنى تېخىمۇ ئەخمەق كۆرسىتىپ قويماسلىق ئۈچۈن، يېڭى تۈرگە مەبلەغ سېلىشنى توختاتتى. ئىگىلىك تىكلىگۈچىلەرنىڭ ئۇلۇغۋار غايىسىنىڭ ئورنىنى ئاشۇ تار قاراشلار ئىگىلىدى، خۇددى كىرىمنىي جىلغىسى ئۇيقۇ مەزگىلىگە كىرگەندەك. بۇ ئاڭلىماققا ئەقىلگە سىغمايدۇ، لېكىن ھەقىقىي يۈز بەرگەن. مىليونلىغان تالانت ئىگىلىرى ئۆزلىرىنىڭ كەلگۈسىنى يارىتىۋاتقانلىقىغا بىر مەھەل ئىشەندى، ئەمما تۇيۇقسىز ئېھتىياتچانلىق بىلەن ئىش كۆرۈش ئەڭ ئومۇملاشقان ئۇسۇلغا ئايلاندى.

بۇ مەزگىلدە، بۇ خىل ئەنسىزلىك ھادىسىسى شىركەتنىڭ ئىچكى قىسمىدا نامايان بولدى ھەمدە كىشىلەر قەلبىدىن تەدرىجىي ئورۇن ئالدى. گۇگول شۇ ۋاقىتتا بارلىققا كېلىپ بولغان ھەمدە 2002-يىلى ئەتراپىدا تېز سۈرئەتتە قەد كۆتۈرگەن، لېكىن ئۇ بىر ئالاھىدە مىسال. گۇگول باش كۆتۈرۈپ چىققاندىن تارتىپ 2007-يىلى ئالما شىركىتى ئايفون (ئالما يانفونى)نى بازارغا سالغان مەزگىلگىچە، كىرېمنىي جىلغىسى خۇددى كارخانا قاقاسلىقىغا ئوخشاپ قالغان بولۇپ، تىلغا ئالغۇچىلىكى يوق ئىدى. ئەمدىلا پەيدا بولغان قىزىق نۇقتا شىركەت Facebook ۋە تۋىتتېر (Twitter) ئۇلارنىڭ ئەجدادى HP، ئىنتېل، قۇياش مىكرو ئېلېكتىرون شىركىتىگە ئوخشاش ئەمەلىي مەھسۇلاتلارنى ياسىمايدۇ، ئىشلەپچىقىرىش جەريانىدا ئون مىڭدىن ئارتۇق ئادەمنى ياللاپ ئىشلىتەلمەيدۇ. كېيىنكى بىر نەچچە يىلدا، كىشىلەرنىڭ نىشانى تەۋەككۈلچىلىك بىلەن پۈتۈنلەي يېڭى كەسىپ ۋە ئۇلۇغ ئوي-پىكىر يارىتىشتىن، ئىستېمالچىلارنى خۇش قىلىش، شۇنداقلا ئاددىي ئەپلەر ۋە ئېلانلارنى تۈركۈملەپ ئىشلەپچىقىرىش ئارقىلىق تېز پۇل تېپىشقا ئۆزگەردى. Facebook نىڭ دەسلەپكى ئىنژېنېرى جېف خاممېرباچېر (Jeff Hammerbacher) ماڭا: «بۇ بەك چاتاق بولدى.» دېگەن ئىدى، كىرىمنىي جىلغىسى بارغانسېرى ھوللىۋودقا ئوخشاپ قالدى. شۇنىڭ بىلەن بىر ۋاقىتتا، ئاشۇ ئىستېمالچىلار تەدرىجىي ھالدا ئىچكى دۇنياسىغا يۈزلىنىپ، ئۆزىنىڭ مەۋھۇم ھاياتىغا مەپتۇن بولۇپ قالدى.

داۋامى بار...

بۈگۈنكى تەۋسىيەلىك دەرس: 6 قىسىملىق نادىر دەرسلىك «چوڭ خوجايىننىڭ مەخپىيىتى» (ھەر بىر قىسمى 30 مىنۇت ئەتراپىدا داۋاملىشىدۇ!)

تۆۋەندىكى ئىككىلىك كودنى سىكاننېرلاپ كۆرۈڭ!

ياكى ئاستى سول تەرەپتىكى «阅读原文» دېگەن جايدىن كىرىپ كۆرۈڭ!

【声明】内容源于网络

Nepkar

在这里你只能获取对你最有用的。别忘了关注哦！

内容 0

粉丝 0

Nepkar 在这里你只能获取对你最有用的。别忘了关注哦！

总阅读0

粉丝0

内容0