باش شۇجى شى جىنپىڭ: كومپارتىيەنىڭ يىلتىزى خەلقتە، تومۇرى خەلقتە

شېنجېن ئىقتىسادىي ئالاھىدە رايونى قۇرۇلغانلىقىنىڭ 40 يىللىقىنى تەبرىكلەش يىغىنىدا قىلىنغان سۆز

(2020-يىلى 10-ئاينىڭ 14-كۈنى)

شى جىنپىڭ

خانىملار ئەپەندىلەر، يولداشلار:

بۈگۈن بىز بۇ يەردە داغدۇغىلىق يىغىلىش ئۆتكۈزۈپ، شېنجېن قاتارلىق ئىقتىسادىي ئالاھىدە رايونلار قۇرۇلغانلىقىنىڭ 40 يىللىقىنى تەبرىكلەپ، ئىقتىسادىي ئالاھىدە رايون قۇرۇش تەجرىبىلىرىنى يەكۈنلەپ، ئىسلاھات، ئېچىۋېتىشنى تېخىمۇ يۇقىرى باشلىنىش نۇقتىسىدا ئىلگىرى سۈرۈپ، پۈتۈن پارتىيە، پۈتۈن مەملىكەت، پۈتۈن جەمئىيەتنى ۋەزىيەتكە قاراپ ئىلگىرىلەپ، ئومۇميۈزلۈك سوتسىيالىستىك زامانىۋىلاشقان دۆلەت قۇرۇش يېڭى مۇساپىسىنى باشلاش، ئىككىنچى 100 يىللىق كۈرەش نىشانىغا يۈرۈش قىلىش ئۈچۈن ئىتتىپاقلىشىپ جاسارەت بىلەن ئىلگىرىلەشكە سەپەرۋەر قىلدۇق.

ئىقتىسادىي ئالاھىدە رايون قۇرۇش، پارتىيە ۋە دۆلەتنىڭ ئىسلاھات، ئېچىۋېتىش ۋە سوتسىيالىستىك زامانىۋىلاشتۇرۇش قۇرۇلۇشىنى ئىلگىرى سۈرۈش ئۈچۈن ئېلىپ بارغان ئۇلۇغ ئىجادىيىتى.

1978-يىلى 12-ئايدا پارتىيە 11-نۆۋەتلىك مەركىزىي كومىتېتىنىڭ 3-ئومۇمىي يىغىنىدا پارتىيە ۋە دۆلەت خىزمىتىنىڭ مەركىزىنى ئىقتىسادىي قۇرۇلۇشقا يۆتكەش، ئىسلاھات، ئېچىۋېتىشنى يولغا قويۇشتىن ئىبارەت تارىخىي تەدبىر ئوتتۇرىغا قويۇلۇپ، پۈتۈن پارتىيە، پۈتۈن مەملىكەتتىكى ھەر مىللەت خەلق سوتسىيالىستىك زامانىۋىلاشتۇرۇش قۇرۇلۇشى ئۈچۈن يېڭى ئۇزۇن سەپەر قىلىشقا سەپەرۋەر قىلىندى.

1979-يىلى 4-ئايدا، گۇاڭدۇڭ ئۆلكىلىك پارتكومنىڭ مەسئۇلى مەركەزدىكى رەھبىرىي يولداشلارغا ئېكسپورت پىششىقلاپ ئىشلەش رايونى قۇرۇش، ئىسلاھات، ئېچىۋېتىشنى ئىلگىرى سۈرۈش تەكلىپىنى بەردى.

يولداش دېڭ شياۋپىڭ ئېنىق قىلىپ: «يەنىلا ئالاھىدە رايون دېگىنىمىز ياخشى، مەركەز بەزى سىياسەتلەرنى بەرسە بولىدۇ، ئۆزۈڭلار بېرىپ ئىشلەپ، قانلىق يول ئېچىپ بېقىڭلار.» دەپ كۆرسەتكەن.

شۇ يىلى 7-ئايدا، پارتىيە مەركىزىي كومىتېتى، گوۋۇيۈەن گۇاڭدۇڭ، فۇجيەن ئۆلكىلىرىنىڭ «ئالاھىدە سىياسەت، جانلىق تەدبىر، بىر قەدەم ئالدىدا مېڭىش»نى يولغا قويۇشىنى تەستىقلىدى ھەمدە ئېكسپورت ئالاھىدە رايونىنى سىناق تەرىقىسىدە قۇردى.

1980-يىلى 8-ئايدا پارتىيە ۋە دۆلەت شېنجېن، جۇخەي، شەنتۇ، شيامېندا ئىقتىسادىي ئالاھىدە رايون قۇرۇشنى تەستىقلىدى، 1988-يىلى 4-ئايدا يەنە خەينەن ئىقتىسادىي ئالاھىدە رايونى قۇرۇشنى تەستىقلاپ، ئىقتىسادىي ئالاھىدە رايوننىڭ پۈتۈن مەملىكەتنىڭ ئىسلاھات، ئېچىۋېتىش ۋە سوتسىيالىستىك زامانىۋىلاشتۇرۇش قۇرۇلۇشىدىكى مۇھىم كۆزنەك ۋە ئۈلگىلىك، تۈرتكىلىك رولىنى جارى قىلدۇرۇشنى ئېنىق تەلەپ قىلدى.

ئۇزاقتىن بۇيان، پارتىيە مەركىزىي كومىتېتىنىڭ كۈچلۈك رەھبەرلىكى ۋە پۈتۈن مەملىكەتنىڭ زور كۈچ بىلەن قوللىشى ئارقىسىدا، ئىقتىسادىي ئالاھىدە رايونلار ئىدىيەدە ئازاد بولۇپ، ئىسلاھاتتا يېڭىلىق يارىتىپ، بۇرچنى دادىل زىممىسىگە ئېلىپ، جاسارەت بىلەن ئىلگىرىلىدى. جۇڭگوچە سوتسىيالىزم قۇرۇش ئۇلۇغ مۇساپىسىدە باتۇرلۇق بىلەن ئالغا ئىلگىرىلەپ، يول ئېچىپ ئىلگىرىلەشنىڭ شانلىق سەھىپىسىنى يارىتىپ، پۈتۈن مەملىكەتنىڭ ئىسلاھات، ئېچىۋېتىش ۋە سوتسىيالىستىك زامانىۋىلاشتۇرۇش قۇرۇلۇشى ئۈچۈن زور تۆھپە قوشتى.

خانىملار، ئەپەندىلەر، يولداشلار!

گۇاڭدۇڭ ئىسلاھات، ئېچىۋېتىشنىڭ باشلامچىسى، ئالدىدا ماڭىدىغان جاي، تەجرىبە رايونى بولۇپ، ئىقتىسادىي ئالاھىدە رايون قۇرۇش ۋاقتى ئەڭ بالدۇر، سانى ئەڭ كۆپ ئۆلكە.

شېنجېن ئىسلاھات، ئېچىۋېتىشتىن كېيىن پارتىيە ۋە خەلق بىر قوللۇق بەرپا قىلغان يېپيېڭى شەھەر، جۇڭگوچە سوتسىيالىزمنىڭ بىر پارچە ئاق قەغەز ئۈستىدىكى ئېسىل نامايەندىسى. شېنجېندىكى كادىرلار ۋە ئامما توسالغۇلارنى سۈپۈرۈپ تاشلاپ، باش چۆكۈرۈپ جاپالىق ئىشلىدى، 40 يىلدا چەتئەللەردىكى بىر قىسىم خەلقئارالاشقان چوڭ شەھەرلەر يۈز يىلدا باسىدىغان مۇساپىنى بېسىپ ئۆتتى. بۇ جۇڭگو خەلقى ياراتقان دۇنيا تەرەققىيات تارىخىدىكى بىر مۆجىزە.

40 يىلدىن بۇيان، شېنجېن ئىجتىمائىي ئىشلەپچىقىرىش كۈچلىرىنى جاسارەت بىلەن ئازاد قىلىپ ۋە راۋاجلاندۇرۇپ، پەن-تېخنىكىدا يېڭىلىق يارىتىشنى زور كۈچ بىلەن ئىلگىرى سۈردى، رايون ئىشلەپچىقىرىش ئومۇمىي قىممىتى 1980-يىلىدىكى 270 مىليون يۈەندىن 2019-يىلى 2 تىرىليون 700 مىليارد يۈەنگە يېتىپ، يىلىغا ئوتتۇرا ھېساب بىلەن %2007 ئاشتى، ئىقتىسادىي ئومۇمىي مىقدار جەھەتتە ئاسىيادىكى شەھەرلەر ئىچىدە 5-ئورۇندا تۇردى، مالىيە كىرىمى 100 مىليون يۈەنگىمۇ يەتمەيدىغان ھالەتتىن 942 مىليارد 400 مىليون يۈەنگە يەتتى. قالاق چېگرا رايونىدىكى كىچىك بازاردىن دۇنياۋى تەسىر كۈچكە ئىگە خەلقئارالاشقان چوڭ شەھەرگە ئايلىنىشتەك تارىخىي ھالقىشنى ئىشقا ئاشۇردى.

40 يىلدىن بۇيان، شېنجېن ئىدىيەدە ئازاد بولۇش، دەۋر بىلەن تەڭ ئىلگىرىلەشتە چىڭ تۇرۇپ، بازار يۆنىلىشىدىكى ئىقتىسادىي تۈزۈلمە ئىسلاھاتىنى باشلامچىلىق بىلەن ئېلىپ بېرىپ، 1000 دىن ئارتۇق ئىسلاھات تەدبىرىنى تۇنجى بولۇپ يولغا قويۇپ، دۆلەتنى قۇدرەت تاپقۇزۇش دەۋر ساداسىنى ياڭرىتىپ، ئىقتىسادىي تۈزۈلمە ئىسلاھاتىدىن ئىسلاھاتنى ئومۇميۈزلۈك چوڭقۇرلاشتۇرۇشقا ئۆتۈشتەك تارىخىي ھالقىشنى ئىشقا ئاشۇردى.

40 يىلدىن بۇيان، شېنجېن «كىرگۈزۈش ۋە چىقىرىش»نى يولغا قويۇشتا چىڭ تۇرۇپ، خەلقئارا ۋە دۆلەت ئىچىدىكى ئىككى بازار، ئىككى خىل بايلىقتىن پائال پايدىلىنىپ، دۇنيا مەبلىغىنى پائال جەلپ قىلدى. تاشقى سودا ئىمپورت-ئېكسپورت ئومۇمىي سوممىسى 1980-يىلىدىكى 18 مىليون دوللاردىن 2019-يىلى 431 مىليارد 500 مىليون دوللارغا يېتىپ، يىلىغا %26.1 ئېشىپ، ئىمپورت-ئېكسپورت سودىسىنى ئاساس قىلىشتىن ھەر تەرەپلىمە يۇقىرى سەۋىيەلىك سىرتقا ئېچىۋېتىشكە ئۆتۈشتەك تارىخىي ھالقىش ئىشقا ئاشۇرۇلدى.

40 يىلدىن بۇيان، شېنجېن سوتسىيالىستىك دېموكراتىك سىياسىينى راۋاجلاندۇرۇشتا چىڭ تۇرۇپ، خەلقنىڭ سۇبيېكتلىق ئورنىغا ھۆرمەت قىلىپ، سوتسىيالىستىك مەنىۋى مەدەنىيلىك قۇرۇلۇشىنى كۈچەيتىپ، سوتسىيالىستىك يادرولۇق قىممەت قارىشىنى پائال يېتىلدۈردى ۋە ئەمەلىيەتتە كۆرسەتتى، ئىقتىسادنى تەرەققىي قىلدۇرۇشتىن سوتسىيالىستىك ماددىي مەدەنىيلىك، سىياسىي مەدەنىيلىك، مەنىۋى مەدەنىيلىك، ئىجتىمائىي مەدەنىيلىك، ئېكولوگىيە مەدەنىيلىكى تەرەققىياتىنى بىر تۇتاش پىلانلاشقىچە بولغان تارىخىي ھالقىشنى ئىشقا ئاشۇردى.

40 يىلدىن بۇيان، شېنجېن خەلقنى مەركەز قىلىشتا چىڭ تۇرۇپ، خەلقنىڭ تۇرمۇش سەۋىيەسىنى زور دەرىجىدە ئۆستۈردى، مائارىپ، داۋالاش، تۇرالغۇ قاتارلىق جەھەتلەردە قىيىنچىلىقى بار جايلاردا ئۆزگىرىش بولدى، 2019-يىلى ئاھالىلەرنىڭ ئىلكىدىكى ئوتتۇرىچە كىرىم 62 مىڭ 500 يۈەنگە يېتىپ، 1985-يىلىدىكىدىن 31.6 ھەسسە ئاشتى؛ ئومۇميۈزلۈك ھاللىق جەمئىيەت قۇرۇپ چىقىش نىشانىنى باشلامچىلىق بىلەن تاماملاپ، كىيىش-تويۇش مەسىلىسىنى ھەل قىلىشتىن يۇقىرى سۈپەتلىك ئومۇميۈزلۈك ھاللىق جەمئىيەت قۇرۇپ چىقىشقىچە بولغان تارىخىي ھالقىشنى ئىشقا ئاشۇردۇق.

40 يىللىق شىپالىق يامغۇر، 40 يىل ئەتىيازدا چېچەكلەپ، كۈزدە مېۋە بەردى. ئەينى يىللاردىكى يىلان ئېغىزىدىن ئېتىلغان زەمبىرەك ئاۋازى قۇلاق تۈۋىمىزدە ياڭراپ تۇراتتى، بۈگۈنكى كۈندە شېنجېن ئىقتىسادىي ئالاھىدە رايونى ھاياتىي كۈچكە تولۇپ، دۇنياغا ئېلىمىزنىڭ ئىسلاھات، ئېچىۋېتىشنىڭ ھەيۋەتلىك ئۇلۇغ كۈچىنى نامايان قىلىپ، جۇڭگوچە سوتسىيالىزمنىڭ پارلاق ئىستىقبالىنى نامايان قىلدى.

قارىماققا ئادەتتىدەك، ئەڭ غەلىتە كۆرۈنگىنى بىلەن، ئاسان بولغىنى بىلەن جاپالىق. شېنجېن قاتارلىق ئالاھىدە ئىقتىسادىي رايونلار ئىزچىل ھەر بىر قەدەمنى ئاسان باسمىدى، ھەر بىر قەدەم ئۈچۈن جاپالىق تىرىشچانلىق كۆرسەتتى. شېنجېن قاتارلىق ئالاھىدە ئىقتىسادىي رايونلارنىڭ ئىسلاھات، تەرەققىيات ئىشلىرىدا قولغا كەلتۈرۈلگەن نەتىجىلەر پارتىيە مەركىزىي كومىتېتىنىڭ كۈچلۈك رەھبەرلىكىنىڭ نەتىجىسى، كادىرلار ۋە ئاممىنىڭ يول ئېچىپ ئىلگىرىلىگەنلىكىنىڭ نەتىجىسى، پۈتۈن مەملىكەت خەلقى ۋە تەرەپ-تەرەپتىن كەڭ كۆلەمدە قوللىغانلىقىنىڭ نەتىجىسى.

بۇ يەردە، مەن پارتىيە مەركىزىي كومىتېتى، گوۋۇيۈەن ۋە مەركىزىي ھەربىي كومىتېتقا ۋاكالىتەن، ئىقتىسادىي ئالاھىدە رايوننىڭ كەڭ قۇرغۇچىلىرىدىن، ئىقتىسادىي ئالاھىدە رايوننىڭ قۇرۇلۇشى ئۈچۈن تۆھپە قوشقان بارلىق يولداشلاردىن سەمىمىي ھال سورايمەن!

مېھمانلارغا، ئىقتىسادىي ئالاھىدە رايون قۇرۇلۇشىغا كۆڭۈل بۆلگەن ۋە مەدەت بەرگەن دۆلەت ئىچى-سىرتىدىكى ھەر ساھە زاتلىرىغا چىن كۆڭلۈمدىن رەھمەت ئېيتىمەن!

خانىملار، ئەپەندىلەر، يولداشلار!

شېنجېن قاتارلىق ئىقتىسادىي ئالاھىدە رايونلارنىڭ مۇۋەپپەقىيەتلىك ئەمەلىيىتى پارتىيە مەركىزىي كومىتېتىنىڭ ئىقتىسادىي ئالاھىدە رايون قۇرۇش توغرىسىدىكى ئىستراتېگىيەلىك تەدبىرىنىڭ تامامەن توغرا ئىكەنلىكىنى تولۇق ئىسپاتلىدى.

ئالاھىدە ئىقتىسادىي رايوننى داۋاملىق قۇرۇپلا قالماي، تېخىمۇ ياخشى قۇرۇش، سەۋىيەسىنى تېخىمۇ ئۆستۈرۈش كېرەك.

شېنجېن قاتارلىق ئىقتىسادىي ئالاھىدە رايونلارنىڭ 40 يىللىق ئىسلاھات، ئېچىۋېتىش ئەمەلىيىتىدە ئۇلۇغ مۆجىزە يارىتىلىپ، قىممەتلىك تەجرىبىلەر توپلىنىپ، جۇڭگوچە سوتسىيالىستىك ئىقتىسادىي ئالاھىدە رايون قۇرۇلۇشىنىڭ قانۇنىيىتىگە بولغان تونۇشىمىز چوڭقۇرلاشتۇرۇلدى.

بىرىنچى، پارتىيەنىڭ ئىقتىسادىي ئالاھىدە رايون قۇرۇلۇشىغا بولغان رەھبەرلىكىدە چىڭ تۇرۇپ، ئىقتىسادىي ئالاھىدە رايون قۇرۇلۇشىنىڭ توغرا يۆنىلىشىنى باشتىن-ئاخىر ساقلاش شەرت.

ئىككىنچى، جۇڭگوچە سوتسىيالىزم تۈزۈمىدە چىڭ تۇرۇپ ۋە ئۇنى مۇكەممەللەشتۈرۈپ، ئىسلاھات ئەمەلىيىتى ئارقىلىق جۇڭگوچە سوتسىيالىزم تۈزۈمىنىڭ تېخىمۇ پىشىپ يېتىلىشى، تېخىمۇ مۇقىملىشىشىغا تۈرتكە بولۇش شەرت.

ئۈچىنچى، تەرەققىياتنىڭ چىڭ قائىدە ئىكەنلىكىدە چىڭ تۇرۇپ، بۆسۈپ ئۆتۈشكە، سىناق قىلىشقا جۈرئەت قىلىش، باشقىلارنىڭ ئالدىدا مېڭىشقا جۈرئەت قىلىشتا چىڭ تۇرۇپ، ئىدىيەدە بۆسۈش ھاسىل قىلىش ئارقىلىق ئىسلاھاتتا بۆسۈش ھاسىل قىلىشقا يېتەكچىلىك قىلىش كېرەك.

تۆتىنچى، ئىشىكنى ھەر تەرەپلىمە ئېچىۋېتىشتە چىڭ تۇرۇش شەرت «كىرگۈزۈش» نىڭ جەلپ قىلىش كۈچى ۋە «چىقىرىش» رىقابەت كۈچىنى ئۈزلۈكسىز ئۆستۈرۈش كېرەك.

بەشىنچى، يېڭىلىق يارىتىشنىڭ بىرىنچى ھەرىكەتلەندۈرگۈچ كۈچ ئىكەنلىكىدە چىڭ تۇرۇپ، دۇنيا پەن-تېخنىكا ئىنقىلابى ۋە كەسىپ ئىسلاھاتىدا تەشەببۇسكارلىق ھوقۇقىنى قولغا كەلتۈرۈش شەرت.

ئالتىنچى، خەلقنى مەركەز قىلغان تەرەققىيات ئىدىيەسىدە چىڭ تۇرۇپ، ئىسلاھات، تەرەققىيات نەتىجىلىرىدىن خەلق ئاممىسىنى تېخىمۇ كۆپ، تېخىمۇ ئادىل مەنپەئەتلەندۈرۈش شەرت.

يەتتىنچى، نىزامنى ئىلمىي چىقىرىش، قانۇننى قاتتىق ئىجرا قىلىش، قانۇننى ئادىل يۈرگۈزۈش، ئومۇمىي خەلق قانۇنغا رىئايە قىلىشتا چىڭ تۇرۇپ، قانۇن ئىدارە قىلىشنى ئىقتىسادىي ئالاھىدە رايون تەرەققىياتىنىڭ مۇھىم كاپالىتىگە ئايلاندۇرۇش شەرت.

سەككىزىنچى، «سۈيى سۈزۈك، تېغى يېشىل بولۇشنىڭ ئۆزى بىر بايلىق.» دېگەن ئىدىيەنى ئەمەلىيەتتىن ئۆتكۈزۈپ، ئىقتىسادىي، ئىجتىمائىي ئىشلار بىلەن ئېكولوگىيەلىك مۇھىتنىڭ ئومۇميۈزلۈك، ماس، ئىمكانىيەتلىك سىجىل تەرەققىياتىنى ئىشقا ئاشۇرۇش كېرەك.

توققۇزىنچى، بىر دۆلەتتە ئىككى تۈزۈم بولۇش ئاساسىي فاڭجېنىنى ئومۇميۈزلۈك، توغرا ئىزچىللاشتۇرۇش شەرت. ئىچكى جايلار بىلەن شياڭگاڭ، ئاۋمېننىڭ يۇغۇرما تەرەققىياتى، ئۆزئارا تۈرتكە بولۇشىنى ئىلگىرى سۈرۈش كېرەك.

ئونىنچى، پۈتۈن مەملىكەت بىر «تاختا شاھمات بولۇش»تا چىڭ تۇرۇپ، ئىقتىسادىي ئالاھىدە رايوننىڭ تەسىر كۆرسىتىش، تۈرتكە بولۇش رولىنى تېخىمۇ ياخشى جارى قىلدۇرۇپ، پۈتۈن مەملىكەتنىڭ تەرەققىياتى ئۈچۈن تۆھپە قوشۇش كېرەك.

يۇقىرىقى ئون ماددا ئىقتىسادىي ئالاھىدە رايوننىڭ 40 يىللىق ئىسلاھات، ئېچىۋېتىش، تەرەققىياتتا يېڭىلىق يارىتىشتا توپلىغان قىممەتلىك تەجرىبىسى بولۇپ، يېڭى دەۋردىكى ئىقتىسادىي ئالاھىدە رايون قۇرۇلۇشىدا مۇھىم يېتەكچى ئەھمىيەتكە ئىگە، ئۇنى ھەسسىلەپ قەدىرلەپ، ئۇزاققىچە داۋاملاشتۇرۇپ، ئەمەلىيەت داۋامىدا ئۈزلۈكسىز بېيىتىش ۋە راۋاجلاندۇرۇش كېرەك.

خانىملار، ئەپەندىلەر، يولداشلار!

بۈگۈنكى دۇنيا 100 يىلدىن بۇيان كۆرۈلۈپ باقمىغان چوڭ ئۆزگىرىشنى باشتىن كەچۈرمەكتە، يېڭىچە تاجىسىمان ئۆپكە ياللۇغى يۇقۇمى يەر شارى چوڭ ئېقىمى يۈرگۈزۈشتىن ئىبارەت بۇ چوڭ ئۆزگىرىشنى تېزلەتتى، ئىقتىسادنىڭ دۇنياۋىلىشىشى تەتۈر ئېقىمغا دۇچ كەلدى، قورۇقچىلىق، بىر تەرەپلىمىلىك يۇقىرى كۆتۈرۈلدى، دۇنيا ئىقتىسادى پەسكويغا چۈشتى، خەلقئارا سودا ۋە مەبلەغ سېلىش زور دەرىجىدە ئازايدى، خەلقئارا ئىقتىساد، پەن-تېخنىكا، مەدەنىيەت، بىخەتەرلىك، سىياسىي قاتارلىق ئەندىزىلەردە چوڭقۇر تەڭشەش يۈز بېرىپ، دۇنيا داۋالغۇش، ئۆزگىرىش مەزگىلىگە قەدەم قويدى.

دۆلىتىمىز جۇڭخۇا مىللەتلىرىنىڭ ئۇلۇغ گۈللىنىشىنى ئىشقا ئاشۇرۇشنىڭ ھالقىلىق مەزگىلىدە تۇرۇۋاتىدۇ، ئىقتىساد يۇقىرى سۈرئەتتە ئېشىش باسقۇچىدىن يۇقىرى سۈپەتلىك تەرەققىيات باسقۇچىغا ئۆتتى.

ئېلىمىز جەمئىيىتىدىكى ئاساسلىق زىددىيەتتە ئۆزگىرىش بولدى، خەلقنىڭ گۈزەل تۇرمۇشقا بولغان تەلىپى ئۈزلۈكسىز ئاشتى، ئىقتىساد ئۇزاققىچە ياخشىلاندى، بازار بوشلۇقى كېڭەيدى، تەرەققىيات ئەۋرىشىملىكى كۈچەيدى. دۆلەت ئىچىدە چوڭ ئايلىنىش ئاساسىي گەۋدە قىلىنغان، دۆلەت ئىچى ۋە خەلقئارادا قوش ئايلىنىش بىر-بىرىنى ئىلگىرى سۈرىدىغان يېڭى تەرەققىيات ئەندىزىسىنى شەكىللەندۈرۈۋاتىدۇ.

شۇنىڭ بىلەن بىللە، دۆلىتىمىز ئىقتىسادى تەرەققىيات ئۇسۇلىنى ئۆزگەرتىش، ئىقتىسادىي قۇرۇلمىنى ياخشىلاش، ئېشىش ھەرىكەتلەندۈرگۈچ كۈچىنى ئۆزگەرتىشنىڭ ئۆتكەلگە ھۇجۇم قىلىش مەزگىلىدە تۇرۇۋاتىدۇ، يۇقىرى سۈپەتلىك تەرەققىياتنى ئىشقا ئاشۇرۇشتا يەنە نۇرغۇن كەمتۈكلۈك ۋە ئاجىزلىقلار بار، ئىقتىسادىي ئالاھىدە رايوننىڭ تەرەققىياتىمۇ بەزى قىيىنچىلىق ۋە خىرىسلارغا دۇچ كەلمەكتە.

يېڭى ۋەزىيەت يېڭى مەسئۇلىيەتنى زىممىسىگە ئېلىشقا، يېڭى نەتىجىلەرنى يارىتىشقا چاقىرىشقا موھتاج.

يېڭى دەۋردىكى ئىقتىسادىي ئالاھىدە رايون قۇرۇلۇشىدا جۇڭگوچە سوتسىيالىزم ئۇلۇغ بايرىقىنى ئېگىز كۆتۈرۈپ، بەشنى بىر گەۋدىلەشتۈرۈش ئومۇمىي ئورۇنلاشتۇرمىسىنى بىر تۇتاش پىلانلاپ ئىلگىرى سۈرۈپ، تۆت ئومۇميۈزلۈك ئىستراتېگىيەلىك ئورۇنلاشتۇرمىسىنى ماس ئىلگىرى سۈرۈپ، ئېلىمىزنىڭ يېڭى تەرەققىيات باسقۇچىغا قەدەم قويۇش ئومۇمىيىتىنى چىقىش قىلىش كېرەك. يېڭى تەرەققىيات ئىدىيەسىنى ئەمەلىيلەشتۈرۈپ، يۇقىرى سۈپەتلىك تەرەققىياتنى ئىلگىرى سۈرۈش، يېڭى تەرەققىيات ئەندىزىسى بەرپا قىلىشنى چىڭ تۇتۇپ، جاسارەت بىلەن ئىلگىرىلەيدىغان كۈرەش ھالىتى، بوران-چاپقۇنغا قارىماي ئىلگىرىلەيدىغان روھىي ھالەت بىلەن ئىسلاھاتنى توختىتىپ قويماي، ئېچىۋېتىش قەدىمىنى توختاتماي، ئىسلاھات، ئېچىۋېتىشنى تېخىمۇ يۇقىرى پەللىدە ئىلگىرى سۈرۈپ، ئىقتىسادىي ئالاھىدە رايون خىزمىتىدە يېڭى ۋەزىيەت يارىتىشقا تۈرتكە بولۇپ، ئومۇميۈزلۈك سوتسىيالىستىك زامانىۋىلاشقان دۆلەت قۇرۇش، ئىككىنچى 100 يىللىق كۈرەش نىشانىغا يېتىش ئۈچۈن يېڭى، تېخىمۇ زور تۆھپە قوشۇش كېرەك.

پارتىيە مەركىزىي كومىتېتى شېنجېننىڭ ئىسلاھات، ئېچىۋېتىش، تەرەققىياتتا يېڭىلىق يارىتىشىغا زور ئۈمىد باغلىدى.

بۇلتۇر 8-ئايدا، پارتىيە مەركىزىي كومىتېتى شېنجېننىڭ جۇڭگوچە سوتسىيالىزمدا ئالدىن ئۈلگە كۆرسىتىش رايونى قۇرۇشىنى قوللاش پىكرىنى ئوتتۇرىغا قويۇپ، ئالاقىدار خىزمەتلەرنى ئومۇميۈزلۈك ئورۇنلاشتۇردى.

شېنجېن جۇڭگوچە سوتسىيالىزمدا ئالدىن ئۈلگە كۆرسىتىش رايونىنى ياخشى قۇرۇپ، سوتسىيالىستىك زامانىۋىلاشقان قۇدرەتلىك دۆلەتنىڭ شەھەر ئۈلگىسىنى يارىتىپ، يېڭى تەرەققىيات ئىدىيەسىنى ئىزچىللاشتۇرۇش، ئەمەلىيلەشتۈرۈش ئىقتىدارى ۋە سەۋىيەسىنى ئۆستۈرۈپ، ئىسلاھاتنى ئومۇميۈزلۈك چوڭقۇرلاشتۇرۇش، ئېچىۋېتىش دائىرىسىنى ئومۇميۈزلۈك كېڭەيتىش يېڭى ئەندىزىسىنى شەكىللەندۈرۈپ، گۇاڭدۇڭ-شياڭگاڭ-ئاۋمېن چوڭ قولتۇق رايونى قۇرۇلۇشىنى ئىلگىرى سۈرۈپ، بىر دۆلەتتە ئىككى تۈزۈم بولۇش ئىشلىرى تەرەققىياتىنىڭ يېڭى ئەمەلىيىتىنى بېيىتىپ، سوتسىيالىستىك زامانىۋىلاشتۇرۇشنى ئالدىن ئىشقا ئاشۇرۇشى كېرەك.

بۇ يېڭى دەۋردىكى پارتىيە مەركىزىي كومىتېتى شېنجېنغا يۈكلىگەن تارىخىي بۇرچ.

بىرىنچى، يېڭى تەرەققىيات ئىدىيەسىنى قەتئىي تەۋرەنمەي ئىزچىللاشتۇرۇش كېرەك

گۇاڭدۇڭ، شېنجېننىڭ ئىقتىسادىي تەرەققىيات سەۋىيەسى بىر قەدەر يۇقىرى، دۇچ كەلگەن بايلىق ئامىلى چەكلىمىسى تېخىمۇ چىڭ. خەلقئارادىن كەلگەن تېخنىكا، ئىختىساسلىقلار قاتارلىق ساھەلەردىكى رىقابەت بېسىمى تېخىمۇ زور، يېڭى تەرەققىيات ئىدىيەسىنى ئەمەلىيلەشتۈرۈش، يۇقىرى سۈپەتلىك تەرەققىياتنى ئىلگىرى سۈرۈش تۈپ چىقىش يولى.

«تەرەققىيات بىرىنچى مۇھىم ۋەزىپە، ئىختىساسلىقلار بىرىنچى بايلىق، يېڭىلىق يارىتىش بىرىنچى ھەرىكەتلەندۈرگۈچ كۈچ» دېگەندە چىڭ تۇرۇپ، سۈپەت ئۆزگىرىشى، ئۈنۈم ئۆزگىرىشى، ھەرىكەتلەندۈرگۈچ كۈچ ئۆزگىرىشىنى باشلامچىلىق بىلەن ئىلگىرى سۈرۈپ، تېخىمۇ يۇقىرى سۈپەتلىك، تېخىمۇ ئۈنۈملۈك، تېخىمۇ ئادىل، تېخىمۇ ئىمكانىيەتلىك سىجىل، تېخىمۇ بىخەتەر تەرەققىياتنى تىرىشىپ ئىشقا ئاشۇرۇش كېرەك.

تەمىنلەش ھالقىسىدىكى قۇرۇلمىلىق ئىسلاھاتتىن ئىبارەت بۇ ئاساسىي لىنىيەدە چىڭ تۇرۇپ، ئىشلەپچىقىرىش، تەقسىملەش، ئوبوروت، ئىستېمالدا ئىچكى بازارغا تېخىمۇ كۆپ تايىنىپ، تەمىنلەش سىستېمىسىنىڭ ئىچكى ئېھتىياجغا ئۇيغۇنلىشىش دەرىجىسىنى ئۆستۈرۈش كېرەك.

يۇقىرى سۈپەتلىك تەمىنلەش ئارقىلىق كۈنسېرى دەرىجىسى ئۆسۈۋاتقان ئىچكى بازار ئېھتىياجىنى قاندۇرۇش كېرەك.

يېڭىلىق يارىتىش ئارقىلىق تەرەققىياتقا تۈرتكە بولۇش ئىستراتېگىيەسىنى قەتئىي تەۋرەنمەي يولغا قويۇپ، يېڭى ھەرىكەت ئېنېرگىيەسىنى يېتىلدۈرۈپ، يېڭى ۋەزىيەت ئېنېرگىيەسىنى ئۆستۈرۈپ، دۇنياۋى تەسىر كۈچكە ئىگە پەن-تېخنىكا ۋە كەسىپتە يېڭىلىق يارىتىش ئېگىزلىكى بەرپا قىلىش كېرەك.

كەسىپ زەنجىرىنى چۆرىدەپ يېڭىلىق يارىتىش زەنجىرىنى ئورۇنلاشتۇرۇپ، يېڭىلىق يارىتىش زەنجىرىنى چۆرىدەپ كەسىپ زەنجىرىنى ئورۇنلاشتۇرۇپ، ئىستراتېگىيەلىك گۈللەنمە كەسىپلەرنى ئالدىن كۆرەرلىك بىلەن ئورۇنلاشتۇرۇپ، كەلگۈسى كەسىپلەرنى يېتىلدۈرۈپ ۋە تەرەققىي قىلدۇرۇپ، رەقەملىك ئىقتىسادنى تەرەققىي قىلدۇرۇش كېرەك.

ئۇل تەتقىقات ۋە ئەمەلىي قوللىنىلىدىغان ئۇل تەتقىقات سېلىنمىسىنىڭ سالمىقىنى ئاشۇرۇپ، شېنجېننىڭ ئىشلەپچىقىرىش، ئوقۇتۇش، تەتقىقاتنى چوڭقۇر بىرلەشتۈرۈش ئەۋزەللىكىنى جارى قىلدۇرۇپ، دۇنيا يېڭىلىق يارىتىش تورىغا تەشەببۇسكارلىق بىلەن سىڭىپ كىرىش كېرەك.

خەلقئارا بويىچە ئالدىنقى قاتاردا تۇرىدىغان سەۋىيە يارىتىش كېرەك. پۇل مۇئامىلە، تەتقىق قىلىپ ئېچىش، لايىھەلەش، بوغالتىرلىق، قانۇن، كۆرگەزمە قاتارلىق زامانىۋى مۇلازىمەتچىلىكنى زور كۈچ بىلەن راۋاجلاندۇرۇپ، مۇلازىمەتچىلىكنىڭ تەرەققىيات ئېنېرگىيە دەرىجىسى ۋە رىقابەت كۈچىنى ئاشۇرۇش كېرەك.

تېخىمۇ ئېچىۋېتىلگەن ئىختىساسلىقلار سىياسىتىنى يولغا قويۇپ، خەلقئارا سەۋىيەگە ئىگە بىر تۈركۈم ئىستراتېگىيەلىك پەن-تېخنىكا ئىختىساسلىقلىرى، پەن-تېخنىكا باشلامچىلىرى، ياش پەن-تېخنىكا ئىختىساسلىقلىرى ۋە يۇقىرى سەۋىيەلىك يېڭىلىق يارىتىش كوللېكتىپىنى كىرگۈزۈپ، ئىختىساسلىقلارنى توپلاپ ئىشلىتىش كېرەك.

ئىككىنچى، دەۋر بىلەن تەڭ ئىلگىرىلەپ، ئىسلاھاتنى ئومۇميۈزلۈك چوڭقۇرلاشتۇرۇش كېرەك

ئىسلاھات مەڭگۈ داۋاملىشىدۇ، ئىسلاھات يولى تۈز ئەمەس. نۆۋەتتە، ئىسلاھات يەنە بىر يېڭى تارىخىي پەيتكە قەدەم قويدى، بۇلارنىڭ كۆپىنچىسى مىسلى كۆرۈلمىگەن يېڭى مەسىلىلەردۇر. ئىسلاھاتنى ئىلگىرى سۈرۈشنىڭ مۇرەككەپلىك دەرىجىسى، سەزگۈرلۈك دەرىجىسى، قىيىنلىق دەرىجىسى 40 يىل ئىلگىرىكىدىن قېلىشمايدۇ، شۇڭا تېخىمۇ زور سىياسىي جاسارەت ۋە ئەقىل-پاراسەت بىلەن تاشنى سىلاپ دەريادىن ئۆتۈش بىلەن يۇقىرى قاتلاملىق لايىھەلەشنى كۈچەيتىشنى بىرلەشتۈرۈشتە چىڭ تۇرۇپ، پۇرسەتنى قولدىن بەرمەي، قەدەمنى پۇختا ئېلىپ مۇھىم ساھەلەر ۋە ئاچقۇچلۇق ھالقىلارنىڭ ئىسلاھاتىنى چوڭقۇرلاشتۇرۇپ، ئىسلاھاتنىڭ سىستېمىلىقى، بىر پۈتۈنلۈكى، ماسلىشىشچانلىقىغا تېخىمۇ ئەھمىيەت بېرىپ، ئىسلاھاتنىڭ ئۇنىۋېرسال ئۈنۈمىنى ئۆستۈرۈش كېرەك.

پارتىيە مەركىزىي كومىتېتى چوڭقۇر تەتقىق قىلىش ئارقىلىق، ئىقتىسادىي ئالاھىدە رايون قۇرۇلغانلىقىنىڭ 40 يىللىقىنى پۇرسەت بىلىپ، شېنجېننىڭ ئۇنىۋېرسال ئىسلاھاتنى نۇقتىدا سىناق قىلىشىنى قوللاپ، تىزىملىك بويىچە تۈركۈملەپ ھوقۇق بېرىش ئۇسۇلى ئارقىلىق شېنجېنغا مۇھىم ساھە ۋە ئاچقۇچلۇق ھالقىلاردىكى ئىسلاھاتتا تېخىمۇ كۆپ ئۆز ئالدىغا ئىش كۆرۈش ھوقۇقى بېرىشنى قارار قىلدى.

27 تۈرلۈك ئىسلاھات تەدبىرى ۋە تۇنجى تۈركۈمدە ھوقۇق بېرىلگەن 40 تۈرلۈك ئىشنى يولغا قويدى.

شېنجېن ئىقتىسادىي ئالاھىدە رايونى مەسئۇلىيەتنى زىممىسىگە ئېلىپ، توغرا يۆنىلىشنى پۇختا ئىگىلەپ، ئىدىيەدە ئازاد بولۇپ، دۇرۇس بولۇپ، يېڭىلىق يارىتىپ، مۇھىم ساھەلەردە بىر تۈركۈم مۇھىم ئىسلاھات تەدبىرلىرىنى تىرىشىپ يولغا قويۇپ، كۆپەيتكىلى، ئومۇملاشتۇرغىلى بولىدىغان بىر تۈركۈم مۇھىم تۈزۈمدە يېڭىلىق يارىتىش نەتىجىلىرىنى شەكىللەندۈرۈشى كېرەك.

يۇقىرى سۈپەتلىك تەرەققىياتتا يولۇققان ئەمەلىي مەسىلىلەرنى ھەل قىلىشنى، تېخىمۇ يۇقىرى سەۋىيەلىك سوتسىيالىستىك بازار ئىگىلىكى تۈزۈلمىسى بەرپا قىلىش ئېھتىياجىنى نەزەردە تۇتۇپ، ئىستراتېگىيەلىك ئۇرۇش قىلىش خاراكتېرىدىكى ئىسلاھاتنى كۆپرەك پىلانلاپ، يېتەكلەش تىپىدىكى ئىسلاھاتنى كۆپرەك ئىلگىرى سۈرۈش كېرەك.

ئامىللارنى بازارلاشتۇرۇپ تەقسىملەش تۈزۈلمە مېخانىزمى، يېڭىلىق يارىتىش زەنجىرى كەسىپ زەنجىرىنىڭ يۇغۇرما تەرەققىيات تۈزۈلمە مېخانىزمى، بازارلاشتۇرۇش، قانۇن ئىدارە قىلىش، خەلقئارالاشقان سودا مۇھىتى، يۇقىرى سەۋىيەلىك ئوچۇق ئىقتىساد تۈزۈلمىسى، خەلق تۇرمۇشى مۇلازىمىتى بىلەن تەمىنلەش تۈزۈلمىسى، ئېكولوگىيەلىك مۇھىت ۋە شەھەر بوشلۇقىنى تۈزەش تۈزۈلمىسى قاتارلىق نۇقتىلىق ساھەلەردە ئالدىن سىناق قىلىشنى مۇكەممەللەشتۈرۈش كېرەك.

ھۆكۈمەتنىڭ باشقۇرۇشى ۋە مۇلازىمىتىنى ياخشىلاپ، ھوقۇق تىزىملىكى، مەسئۇلىيەت تىزىملىكى، پاسسىپ تىزىملىك تۈزۈمىنى ئومۇميۈزلۈك يولغا قويۇپ، ھۆكۈمەت بىلەن سودىگەرلەرنىڭ يېقىن، پاك مۇناسىۋىتىنى تېز بەرپا قىلىش كېرەك.

كارخانىچىلار روھىنى يەنىمۇ ئۇرغۇتۇپ ۋە ئەۋج ئالدۇرۇپ، كارخانىچىلارنىڭ قانۇنلۇق ھوقۇق-مەنپەئىتىنى قانۇن بويىچە قوغداپ، مۈلۈك ھوقۇقى ۋە بىلىم مۈلۈك ھوقۇقىنى قانۇن بويىچە قوغداپ، كارخانىچىلارنى ئىش قىلىش، ئىگىلىك تىكلەشكە رىغبەتلەندۈرۈش كېرەك.

ئۈچىنچى، قەتئىي ئىرادە بىلەن ئېچىۋېتىشنى ئومۇميۈزلۈك كېڭەيتىش كېرەك. نۆۋەتتە، دۇنيا ئىقتىسادى نۇرغۇن مۇرەككەپ خىرىسقا دۇچ كەلمەكتە، بىز ھەرگىزمۇ تەتۈر شامال ۋە تەتۈر دولقۇننىڭ توسقۇنلۇقىغا ئۇچرىماسلىقىمىز، تارىخنىڭ توغرا تەرىپىدە تۇرۇپ، ئېچىۋېتىشنى قەتئىي تەۋرەنمەي ئومۇميۈزلۈك كېڭەيتىپ، ئوچۇق دۇنيا ئىقتىسادى بەرپا قىلىشنى ئىلگىرى سۈرۈپ، ئىنسانىيەت تەقدىرى ئورتاق گەۋدىسى بەرپا قىلىشقا تۈرتكە بولۇشىمىز كېرەك

يېڭى تەرەققىيات ئەندىزىسى بېكىنمە ھالەتتىكى دۆلەت ئىچى ئايلىنىشى ئەمەس، بەلكى ئېچىۋېتىلگەن دۆلەت ئىچى ۋە خەلقئارا قوش ئايلىنىش. ئىشلەپچىقىرىش، تەقسىمات، ئوبوروت، ئىستېمال سىستېمىسىنى سەرخىللاشتۇرۇپ ۋە دەرىجىسىنى ئۆستۈرۈپ، ئىچكى-تاشقى ئىقتىسادىي ئالاقىنى چوڭقۇرلاشتۇرۇپ، ئىقتىسادنىڭ چوڭقۇرلۇقىنى ئاشۇرۇپ، دۆلەت ئىچىدىكى چوڭ ئايلىنىشنى راۋانلاشتۇرۇش ۋە دۆلەت ئىچى-سىرتىدىكى قوش ئايلىنىشنى راۋانلاشتۇرۇش ئىقتىدارىنى كۈچەيتىپ، قائىدە ئۆلچىمى قاتارلىق تۈزۈم تىپىدىكى ئېچىۋېتىشنى تېز ئىلگىرى سۈرۈش كېرەك.

تېخىمۇ يۇقىرى سەۋىيەلىك ئوچۇق ئىقتىساد يېڭى تۈزۈلمىسىنى باشلامچىلىق بىلەن بەرپا قىلىش كېرەك. ئىچكى-تاشقى سودا، مەبلەغ سېلىش، مەبلەغ يۈرۈشتۈرۈش، مالىيە-باج، پۇل مۇئامىلىدە يېڭىلىق يارىتىش، چېگرادىن كىرىش-چىقىش قاتارلىق جەھەتلەردە تېخىمۇ جانلىق سىياسەت سىستېمىسى، تېخىمۇ ئىلمىي باشقۇرۇش تۈزۈلمىسى ئۈستىدە ئىزدىنىپ، «بىر بەلباغ، بىر يول» بويىدىكى دۆلەتلەر ۋە رايونلار بىلەن كۆپ قاتلاملىق، كۆپ ساھەلىك ئەمەلىي ھەمكارلىقنى قانات يايدۇرۇشنى كۈچەيتىش كېرەك.

ئېچىۋېتىش بولغانسېرى بىخەتەرلىككە شۇنچە ئەھمىيەت بېرىپ، تەرەققىيات بىلەن بىخەتەرلىكتىن ئىبارەت ئىككى چوڭ ئىشنى بىر تۇتاش پىلانلاپ، ئۆزىنىڭ رىقابەت ئىقتىدارى، ئېچىۋېتىش، نازارەت قىلىپ باشقۇرۇش ئىقتىدارى، خەۋپ-خەتەرنىڭ ئالدىنى ئېلىش ۋە ئۇنى تىزگىنلەش ئىقتىدارىنى كۈچەيتىش كېرەك.

تۆتىنچى، تەپەككۇردا يېڭىلىق يارىتىپ، شەھەرنى ئىدارە قىلىش سىستېمىسى ۋە ئىدارە قىلىش ئىقتىدارىنى زامانىۋىلاشتۇرۇشنى ئىلگىرى سۈرۈش كېرەك

40 يىل تېز سۈرئەتتە تەرەققىي قىلىش ئارقىلىق، شېنجېن ئىقتىسادىي ئالاھىدە رايونىنىڭ شەھەر بوشلۇقى قۇرۇلمىسى، ئىشلەپچىقىرىش ئۇسۇلى، تەشكىلىي شەكلى ۋە ھەرىكەت مېخانىزمىدا چوڭقۇر ئۆزگىرىش بولۇپ، شەھەرنى ئىدارە قىلىش بېسىمى كۆرۈنەرلىك بولۇش، تەرەققىيات بوشلۇقى يېتەرلىك بولماسلىق قاتارلىق نۇرغۇن خىرىسقا دۇچ كەلدى.

تولۇق دەۋرىيلىك باشقۇرۇش ئېڭىنى تۇرغۇزۇپ، شەھەرنى ئىدارە قىلىش سىستېمىسى ۋە ئىدارە قىلىش ئىقتىدارىنى زامانىۋىلاشتۇرۇشنى تېز ئىلگىرى سۈرۈپ، چوڭ تىپتىكى شەھەرلەرنىڭ ئالاھىدىلىكى ۋە قانۇنىيىتىگە ئۇيغۇن كېلىدىغان ئىدارە قىلىش يېڭى يولىنى تىرىشىپ تېپىپ چىقىش كېرەك.

قانۇن بويىچە ئىدارە قىلىشنى كۈچەيتىپ، قانۇن ئىدارە قىلىش تەپەككۇرى ۋە قانۇن ئىدارە قىلىش ئۇسۇلىدىن پايدىلىنىپ، شەھەرنى ئىدارە قىلىشتىكى جاھىل كېسەل قىيىن مەسىلىسىنى ھەل قىلىشقا ماھىر بولۇپ، قانۇن بويىچە ئىدارە قىلىشنى ئىجتىمائىي ئورتاق تونۇش ۋە ئاساسىي مىزانغا ئايلاندۇرۇش كېرەك.

ئىلمىيلاشتۇرۇش، ئىنچىكىلەشتۈرۈش، ئەقلىي ئىقتىدارلاشتۇرۇشقا كۈچ سەرپ قىلىشقا ئەھمىيەت بېرىپ، شېنجېننىڭ ئۇچۇر كەسپىنىڭ تەرەققىيات ئەۋزەللىكىنى جارى قىلدۇرۇش كېرەك. شەھەر باشقۇرۇش ۋاسىتىسى، باشقۇرۇش ئەندىزىسى، باشقۇرۇش ئىدىيەسىدە يېڭىلىق يارىتىشنى ئىلگىرى سۈرۈپ، شەھەرنى تېخىمۇ ئەقىللىق، تېخىمۇ پاراسەتلىك قىلىش كېرەك.

بەشىنچى، ھەقىقىي تۇتۇپ، ئەمەلىي ئىشلەپ، خەلقنى مەركەز قىلغان تەرەققىيات ئىدىيەسىنى ئەمەلىيەتتە كۆرسىتىش كېرەك

جۇڭگو كوممۇنىستىك پارتىيەسىنىڭ يىلتىزى خەلقتە، تومۇرى خەلقتە.

خەلقنىڭ گۈزەل تۇرمۇشقا بولغان ئىنتىلىشى بىزنىڭ كۈرەش نىشانىمىز.

ئالاھىدە ئىقتىسادىي رايوننىڭ ئىسلاھات، تەرەققىياتىنىڭ مەۋقەسى ۋە مەقسىتىنى بۇ نىشانغا مەركەزلەشتۈرۈش كېرەك.

تۇرمۇشنىڭ ياخشى ئۆتكەن-ئۆتمىگەنلىكىدە خەلق ئاممىسى ھەممىدىن بەك سۆز قىلىش ھوقۇقىغا ئىگە.

خەلق ئاممىسى ئومۇميۈزلۈك كۆڭۈل بۆلۈۋاتقان، ئىنكاسى كۈچلۈك، تەكرار كۆرۈلۈۋاتقان مەسىلىلەرنى چىقىش قىلىپ، تېخىمۇ كۆپ ئىسلاھات، يېڭىلىق يارىتىش تەدبىرلىرىنى ئوتتۇرىغا قويۇش كېرەك

ئىشقا ئورۇنلاشتۇرۇش، مائارىپ، داۋالاش، ئىجتىمائىي كاپالەت، تۇرالغۇ، كۈتۈنۈش، يېمەكلىك بىخەتەرلىكى، ئېكولوگىيەلىك مۇھىت، جەمئىيەت ئامانلىقى قاتارلىق مەسىلىلەرنى بىر-بىرلەپ ياخشى ھەل قىلىپ، خەلق ئاممىسىنىڭ ئېرىشىش تۇيغۇسىنى تىرىشىپ تېخىمۇ تولۇق، بەخت تۇيغۇسىنى تېخىمۇ ئىمكانىيەتلىك سىجىل، بىخەتەرلىك تۇيغۇسىنى تېخىمۇ كاپالەتكە ئىگە قىلىش كېرەك.

خەلق ئاممىسىنىڭ ئىجادكارلىق روھىغا ھۆرمەت قىلىپ، خەلق ئاممىسىدىن ئىقتىسادىي ئالاھىدە رايون تەرەققىياتىنىڭ يېڭىلىق يارىتىش، ئىجاد قىلىش ھاياتىي كۈچىنى ئۈزلۈكسىز قوبۇل قىلىش كېرەك.

تەرەققىياتنىڭ تەڭپۇڭلۇقىنى ئۆستۈرۈشنى مۇھىم ئورۇنغا قويۇپ، جامائەت بايلىقىنىڭ ئاساسىي قاتلامغا كېڭىيىشىنى ئۈزلۈكسىز ئىلگىرى سۈرۈپ، ئەلا سۈپەتلىك، تەڭپۇڭ جامائەت مۇلازىمىتى سىستېمىسىنى بەرپا قىلىپ، ئومۇميۈزلۈك قاپلىغان ئىمكانىيەتلىك سىجىل ئىجتىمائىي كاپالەت سىستېمىسىنى بەرپا قىلىش كېرەك.

دائىملاشقان يۇقۇمنىڭ ئالدىنى ئېلىش ۋە ئۇنى تىزگىنلەشنى قىلچە بوشاشتۇرماي چىڭ تۇتۇپ، تەجرىبە-ساۋاقلارنى ئەستايىدىل يەكۈنلەپ، بىرنى بىلىش ئارقىلىق باشقىلارنىمۇ بىلىۋېلىش ئارقىلىق جامائەت ساغلاملىقىدىكى كەمتۈكلۈكنى تولۇقلاش كېرەك.

ئالتىنچى، گۇاڭدۇڭ-شياڭگاڭ-ئاۋمېن چوڭ قولتۇق رايونى قۇرۇلۇشىنى پائال چوڭقۇر ئىلگىرى سۈرۈش كېرەك

گۇاڭدۇڭ-شياڭگاڭ-ئاۋمېن چوڭ قولتۇق رايونى قۇرۇلۇشى دۆلەتنىڭ مۇھىم تەرەققىيات ئىستراتېگىيەسى، شېنجېن چوڭ قولتۇق رايونى قۇرۇلۇشىنىڭ مۇھىم موتورى.

گۇاڭدۇڭ-شياڭگاڭ-ئاۋمېن چوڭ قولتۇق رايونى قۇرۇلۇشىدىن ئىبارەت مۇھىم تارىخىي پۇرسەتنى چىڭ تۇتۇپ، ئۈچ جاينىڭ ئىقتىسادىي ھەرىكىتىنىڭ قائىدىسىنى جىپسىلاشتۇرۇش، مېخانىزمىنى جىپسىلاشتۇرۇشنى ئىلگىرى سۈرۈپ، گۇاڭدۇڭ-شياڭگاڭ-ئاۋمېن چوڭ قولتۇق رايونى شەھەرلەر ئارا تۆمۈريول قۇرۇلۇشىنى تېزلىتىپ، ئادەم، مال قاتارلىق تۈرلۈك ئامىللارنىڭ يۇقىرى ئۈنۈملۈك، قولايلىق يۆتكىلىشىنى ئىلگىرى سۈرۈپ، بازار سەۋىيەسىنى ئۆستۈرۈش كېرەك.

چيەنخەي شېنجېن-شياڭگاڭ زامانىۋى مۇلازىمەتچىلىك ھەمكارلىق رايونىنىڭ ئىسلاھات، ئېچىۋېتىش ئىشلىرىنى چوڭقۇرلاشتۇرۇپ، خېتاۋ-شېنجېن-شياڭگاڭ پەن-تېخنىكىدا يېڭىلىق يارىتىش ھەمكارلىق رايونىنى ياخشى پىلانلاپ قۇرۇپ چىقىش كېرەك.

خېڭچىن گۇاڭدۇڭ-ئاۋمېن چوڭقۇر ھەمكارلىق رايونى قۇرۇلۇشىنى تېزلىتىش. داۋان رايونى ئۇنىۋېرسال دۆلەت ئىلىم-پەن مەركىزىنى ئالدىن قوزغىتىش رايونى قۇرۇلۇشىنى تۇتقا قىلىپ، شياڭگاڭ، ئاۋمېننىڭ يېڭىلىق يارىتىش بايلىقى بىلەن ھەمكارلىشىش، ماسلىشىشنى كۈچەيتىش كېرەك.

شياڭگاڭ، ئاۋمېن، تەيۋەنلىك قېرىنداشلار ۋە چەت ئەللەردىكى مۇھاجىر قېرىنداشلارنى مەبلەغ سېلىپ كەسىپنى گۈللەندۈرۈش، قوش يۆنىلىشلىك ئېچىۋېتىشنىڭ مۇھىم رولىنى تولۇق جارى قىلدۇرۇشقا داۋاملىق رىغبەتلەندۈرۈپ ۋە يېتەكلەپ، ئىقتىسادىي ئالاھىدە رايوننىڭ تەرەققىياتىدا يېڭى تۆھپە قوشۇش كېرەك.

گۇاڭدۇڭ، شياڭگاڭ، ئاۋمېننىڭ مۇھىم ھەمكارلىق سۇپىسىدىن تولۇق پايدىلىنىپ، تېخىمۇ كۆپ شياڭگاڭ، ئاۋمېن ياش-ئۆسمۈرلىرىنى ئىچكىرى ئۆلكىلەرگە كېلىپ ئۆگىنىش، ئىشقا ئورۇنلىشىش، تۇرمۇش كەچۈرۈشكە جەلپ قىلىپ، گۇاڭدۇڭ، شياڭگاڭ، ئاۋمېن ياش-ئۆسمۈرلىرىنىڭ كەڭ دائىرىدە ئالاقىلىشىشى، ئومۇميۈزلۈك ئالماشتۇرۇشى، چوڭقۇر ئارىلىشىشىنى ئىلگىرى سۈرۈپ، ۋەتەنگە بولغان مەركەزگە ئىنتىلىش كۈچىنى ئاشۇرۇش كېرەك.

مەركەز ۋە دۆلەتنىڭ ئالاقىدار تارماقلىرى پارتىيە مەركىزىي كومىتېتىنىڭ ئىستراتېگىيەلىك مەقسىتىنى توغرا ئىگىلەپ، شېنجېن قاتارلىق ئىقتىسادىي ئالاھىدە رايونلارنىڭ ئىسلاھات، تەرەققىيات خىزمىتىنى پۈتۈن كۈچى بىلەن قوللاپ، بەشنى بىر گەۋدىلەشتۈرۈش ئومۇمىي ئورۇنلاشتۇرمىسىنى بىر تۇتاش پىلانلاپ ئىلگىرى سۈرۈش، تۆت ئومۇميۈزلۈك ئىستراتېگىيەلىك ئورۇنلاشتۇرمىسىنى ماس ئىلگىرى سۈرۈش تەلىپى بويىچە، ئىقتىسادىي ئالاھىدە رايونلارنىڭ ئىسلاھات، ئېچىۋېتىشنى چوڭقۇرلاشتۇرۇش، ئالدىن كۆرەرلىك پەن-تېخنىكىدا يېڭىلىق يارىتىشنى قانات يايدۇرۇش، ئىستراتېگىيەلىك گۈللەنمە كەسىپلەرنى تەرەققىي قىلدۇرۇش، يۇقىرى سەۋىيەلىك سىرتقا ئېچىۋېتىشنى تەرەققىي قىلدۇرۇش، دېموكراتىك قانۇن ئىدارە قىلىش قۇرۇلۇشى، سوتسىيالىستىك مەنىۋى مەدەنىيلىك قۇرۇلۇشى، خەلق تۇرمۇشىنى كاپالەتلەندۈرۈش ۋە ياخشىلاش، جەمئىيەتنى ئىدارە قىلىشتا ئىسلاھ قىلىش ۋە يېڭىلىق يارىتىش، ئېكولوگىيە مەدەنىيلىكى قۇرۇلۇشىنى كۈچەيتىش قاتارلىق خىزمەتلەرنى كۈچەيتىش، يېڭى دەۋردىكى ئىقتىسادىي ئالاھىدە رايوننىڭ ئىسلاھات، تەرەققىياتىغا ئىلمىي يېتەكچىلىك قىلىش ۋە كۈچلۈك مەدەت بېرىش كېرەك.

خانىملار، ئەپەندىلەر، يولداشلار!

باھار ئەمەس بىر تاللا گۈل تەنھا ئېچىلسا، باھار دەيمىز بارچە گۈللەر تەكشى ئېچىلسا.

بىز ئۆزئارا مەنپەئەت يەتكۈزۈش، ئورتاق پايدا ئېلىش ئاساسىدىكى ئېچىۋېتىش ئىستراتېگىيەسىنى قەتئىي تەۋرەنمەي يولغا قويۇپ، ھەم دۇنيادىن تەرەققىيات ھەرىكەتلەندۈرگۈچ كۈچى ئالىمىز، ھەم جۇڭگونىڭ تەرەققىياتى ئارقىلىق دۇنياغا تېخىمۇ ياخشى نەپ يەتكۈزىمىز.

ئالاھىدە ئىقتىسادىي رايون قۇرۇلۇشىنىڭ 40 يىللىق ئەمەلىيىتى دۇنيادىكى ھەرقايسى دۆلەتلەرنىڭ ئورتاق قاتنىشىشىدىن ئايرىلالمايدۇ، شۇنداقلا ھەرقايسى دۆلەتلەرگە كەڭ تەرەققىيات بوشلۇقى يارىتىپ بەردى، تەرەققىيات مەنپەئىتىدىن بەھرىمەن قىلدى.

دۇنيادىكى ھەرقايسى دۆلەتلەرنىڭ جۇڭگونىڭ ئىقتىسادىي ئالاھىدە رايونلىرىنىڭ ئىسلاھات، ئېچىۋېتىش، تەرەققىياتىغا تېخىمۇ كۆپ قاتنىشىشىنى قارشى ئالىمىز.

ئورتاق كېڭىشىش، ئورتاق قۇرۇش، ئورتاق بەھرىلىنىش، ئورتاق پايدا ئېلىش يېڭى ئەندىزىسىنى بەرپا قىلىش كېرەك.

خانىملار، ئەپەندىلەر، يولداشلار!

ئالاھىدە ئىقتىسادىي رايون ئىسلاھات، ئېچىۋېتىشنىڭ ئەڭ ئالدىنقى سېپىدە تۇرۇۋاتىدۇ، پارتىيەنىڭ ئومۇميۈزلۈك رەھبەرلىكى ۋە پارتىيە قۇرۇلۇشىنى كۈچەيتىشكە تېخىمۇ يۇقىرى تەلەپ قويۇلىدۇ.

يېڭى دەۋردىكى پارتىيە قۇرۇلۇشىنىڭ ئومۇمىي تەلىپىنى چوڭقۇر ئىزچىللاشتۇرۇپ، ئىسلاھات، يېڭىلىق يارىتىش روھى بىلەن پارتىيەنىڭ ئومۇميۈزلۈك رەھبەرلىكى ۋە پارتىيە قۇرۇلۇشىنى كۈچەيتىش جەھەتتە باشلامچىلىق بىلەن ئۈلگە كۆرسىتىپ، ئاساسىي قاتلام پارتىيە تەشكىلاتلىرىنىڭ قاپلاش دائىرىسىنى كېڭەيتىش ۋە خىزمەت قاپلاش دائىرىسىنى كېڭەيتىش كېرەك.

پارتىيە ئەزالىرى، كادىرلار غايە-ئېتىقادىنى چىڭىتىپ، بىلىم قارىشىنى يېڭىلاپ، قاتتىق سىناقلارغا بەرداشلىق بېرەلەيدىغان ماھارەتنى ئىگىلەپ، مەسىلىلەرنى ئاڭلىق ھالدا پارتىيە ۋە دۆلەت ئومۇمىيىتىدە تۇرۇپ ئويلىشى، ئىش بېجىرىشى كېرەك.

رىغبەتلەندۈرۈش مېخانىزمىنى ئورنىتىپ ۋە مۇكەممەللەشتۈرۈپ، ئىقتىدارلىقلارنى ئۆستۈرۈش، ياخشىلىرىنى مۇكاپاتلاش، ئىقتىدارسىزلىرىنى چۈشۈرۈش، ناچارلىرىنى شاللاشتەك توغرا يۆنىلىشنى شەكىللەندۈرۈشنى ئىلگىرى سۈرۈپ، ئىسلاھاتچىلارغا مەسئۇل بولۇش، مەسئۇلىيەتنى زىممىسىگە ئالغۇچىلارغا مەسئۇل بولۇش، پارتىيە ئەزالىرى، كادىرلارنىڭ ئىش قىلىش، ئىگىلىك تىكلەش قىزغىنلىقى ۋە غەيرىتىنى ئۇرغۇتۇش كېرەك.

ئىستىلنى توغرىلاش، ئىنتىزامنى چىڭىتىشنى ئىزچىل داۋاملاشتۇرۇپ، چىرىكلەشكەنلەرنى قەتئىي جازالاپ، شەكىلۋازلىق، بىيۇروكراتلىققا قەتئىي قارشى تۇرۇپ، ئىستىل دۇرۇس، كەيپىيات توغرا بولغان ياخشى سىياسىي ئېكولوگىيە بەرپا قىلىش كېرەك.

جۇڭگوچە سوتسىيالىزم ماددىي مەدەنىيلىك ۋە مەنىۋى مەدەنىيلىك ئومۇميۈزلۈك تەرەققىي قىلىدىغان سوتسىيالىزم.

ئالاھىدە ئىقتىسادىي رايون «ئىككى قولدا تۇتۇش، ئىككىلا قول قاتتىق بولۇش»تا چىڭ تۇرۇپ، ماددىي مەدەنىيلىك قۇرۇلۇشى ۋە مەنىۋى مەدەنىيلىك قۇرۇلۇشى جەھەتتە ئەلا جاۋاب بېرىشى كېرەك.

غايە-ئېتىقاد تەربىيەسىنى كۈچەيتىپ، سوتسىيالىستىك يادرولۇق قىممەت قارىشىنى يېتىلدۈرۈپ ۋە ئەمەلىيەتتە كۆرسىتىپ، جۇڭگوچە سوتسىيالىزم ۋە جۇڭگو ئارزۇسى تەشۋىق-تەربىيەسىنى چوڭقۇرلاشتۇرۇپ، كادىرلار ۋە ئاممىنى، بولۇپمۇ ياشلار، ئۆسمۈرلەرنى جۇڭگوچە سوتسىيالىزم يولى ئىشەنچى، نەزەرىيە ئىشەنچى، تۈزۈم ئىشەنچى ۋە مەدەنىيەت ئىشەنچىنى چىڭىتىشقا تەربىيەلەش ۋە يېتەكلەش كېرەك.

ۋەتەنپەرۋەرلىك يادرو قىلىنغان مىللىي روھ ۋە ئىسلاھات، يېڭىلىق يارىتىش يادرو قىلىنغان دەۋر روھىنى ئەۋج ئالدۇرۇپ، بۆسۈپ ئۆتۈشكە، سىناق قىلىشقا جۈرئەت قىلىش، باتۇرلۇق بىلەن ئالدىدا مېڭىش، باش چۆكۈرۈپ جاپالىق ئىشلەشتەك ئالاھىدە رايون روھىنى داۋاملىق جارى قىلدۇرۇپ، كادىرلار ۋە ئاممىنى باتۇرلۇق بىلەن يېڭى دەۋرنىڭ «بوز يەر ئۆزلەشتۈرۈش» كالىسى بولۇشقا رىغبەتلەندۈرۈش كېرەك.

ئاممىۋى مەنىۋى مەدەنىيلىك بەرپا قىلىش پائالىيىتىنى چوڭقۇر قانات يايدۇرۇپ، ئىجتىمائىي ئەخلاق، كەسىپ ئەخلاقى، ئائىلە گۈزەل ئەخلاقى، شەخسىي پەزىلەت تەربىيەسىنى كەڭ قانات يايدۇرۇش كېرەك. خەلقنىڭ مەدەنىيەت ساپاسى ۋە ئىجتىمائىي مەدەنىيلىك دەرىجىسىنى ئۈزلۈكسىز ئۆستۈرۈش كېرەك.

جامائەت مەدەنىيەت ئەسلىھەلىرى قۇرۇلۇشىنى كۈچەيتىپ، مەدەنىيەت كەسپىنىڭ يۇقىرى سۈپەتلىك تەرەققىياتىنى ئىلگىرى سۈرۈپ، خەلقنىڭ مەنىۋى مەدەنىيەت تۇرمۇشىدىكى يېڭى ئارزۇسىنى تېخىمۇ ياخشى قاندۇرۇش كېرەك.

خانىملار، ئەپەندىلەر، يولداشلار!

40 يىللىق قاينام-تاشقىنلىق، يېڭى مۇساپە كىشىنى جاسارەت بىلەن ئىلگىرىلەشكە ئۈندەيدۇ.

ئالاھىدە ئىقتىسادىي رايوندىكى غايەت زور ئۆزگىرىشلەرنى ئەۋلادمۇ-ئەۋلاد ئالاھىدە رايون قۇرغۇچىلىرى جان تىكىپ كۈرەش قىلىش ئارقىلىق بارلىققا كەلتۈرگەن.

يېڭى باشلىنىش نۇقتىسىدا، ئىقتىسادىي ئالاھىدە رايوندىكى كادىرلار ۋە ئامما پارتىيە مەركىزىي كومىتېتىنىڭ تەدبىر، ئورۇنلاشتۇرمىلىرىنى قەتئىي تەۋرەنمەي ئىزچىللاشتۇرۇپ ۋە ئەمەلىيلەشتۈرۈپ، بۆسۈش روھى، يېڭىلىق يارىتىش غەيرىتى، ئىشلەش ئىستىلىنى مەڭگۈ ساقلىشى كېرەك. تىرىشىپ تېخىمۇ كۆپ «باھار ھېكايىسى»نى داۋاملىق يېزىپ، تىرىشىپ دۇنيانى ھەيران قالدۇرىدىغان يېڭى، تېخىمۇ زور مۆجىزىلەرنى يارىتايلى!