يېقىندا، پارتىيە مەركىزىي كومىتېتى، گوۋۇيۈەننىڭ تەدبىر-ئورۇنلاشتۇرمىلىرىغا ئاساسەن، مەركەز مالىيەسى 20 مىليارد يۈەن مەبلەغ ئاجرىتىپ، ئەمەلىي ئاشلىق تېرىغان دېھقانلارغا بىر قېتىملىق تولۇقلىما بېرىپ، يېزا ئىگىلىك ئىشلەپچىقىرىش ۋاسىتىلىرى باھاسىنىڭ ئۆرلىشى ئېلىپ كەلگەن ئاشلىق تېرىش چىقىمىنىڭ ئېشىپ كېتىشىنى پەسەيتىپ، دېھقانلارنىڭ كىرىمىنى مۇقىملاشتۇرۇپ، دېھقانلارنىڭ ئاشلىق تېرىش ئاكتىپلىقىنى قوزغايدۇ.
سىياسەتنىڭ ئىزچىللىقىنى ساقلاش، سىياسەتنىڭ دەل جايىدا بولۇش دەرىجىسىنى ئۆستۈرۈش، يەرلىكنىڭ مەشغۇلات قىلىشى، ئىجرا قىلىشىغا قولايلىق يارىتىش ئۈچۈن، بۇ قېتىمقى تولۇقلىما تارقىتىشتا 2021-يىلىدىكى ئالاقىدار سىياسەتلەر داۋاملاشتۇرۇلىدۇ. تولۇقلىما بېرىش ئوبيېكتى ئەمەلىي ئاشلىق تېرىيدىغان دېھقانلار بولىدۇ، كونكرېت قىلىپ ئېيتقاندا، ئۆزىنىڭ ھۆددە يېرىدىن پايدىلىنىپ ئاشلىق تېرىيدىغان دېھقانلار، شۇنداقلا يەرنى ئوبوروت قىلىپ ئاشلىق تېرىيدىغان چوڭ ئائىلىلەر، ئائىلە دېھقانچىلىق مەيدانلىرى، دېھقانلار ھەمكارلىق كوپىراتىپلىرى، يېزا ئىگىلىك كارخانىلىرى قاتارلىق يېڭىچە يېزا ئىگىلىك تىجارەت سۇبيېكتلىرىنى ئۆز ئىچىگە ئالىدۇ. ئاشلىق تېرىش، يىغىۋېلىشنىڭ پۈتۈن جەريانىدا ئىجتىمائىيلاشقان مۇلازىمەتنى قانات يايدۇرغانلىرىدا، مۇلازىمەت قىلغۇچى ئىككى تەرەپنىڭ توختام (كېلىشىم) ىدىكى پۈتۈم بويىچە، تولۇقلىما بېرىش ئوبيېكتىنى يەرلىكنىڭ ئەمەلىيىتىگە بىرلەشتۈرۈپ بېكىتسە بولىدۇ، پىرىنسىپ جەھەتتە يېزا ئىگىلىك ئىشلەپچىقىرىش ۋاسىتىلىرى باھاسىنىڭ ئۆرلەش تەننەرخىنى ئاساسلىق ئۈستىگە ئالغۇچىغا تولۇقلىما بېرىش كېرەك. يەرنى ئوبوروت قىلىپ ئاشلىق تېرىيدىغان شەخسلەر ۋە تەشكىلاتلارغا قارىتا، ياردەم پۇلى بېرىش ئوبيېكتى ئىمزالانغان ئوبوروت توختامى (كېلىشىمى)گە ئاساسەن بېكىتىلىدۇ. ياردەم پۇل ئۆلچىمىنى جايلار ئالاقىدار ئەھۋاللارغا بىرلەشتۈرۈپ ئۇنىۋېرسال بېكىتىدۇ، ناھىيە تەۋەسىدىكى ياردەم پۇل ئۆلچىمى پىرىنسىپ جەھەتتە بىرلىككە كەلتۈرۈلىدۇ. تارقىتىش ئۇسۇلىنى جايلار 2021-يىلىدىكى ئالاقىدار خىزمەتلەر ئاساسىدا، ئەمەلىيەتكە بىرلەشتۈرۈپ يەنىمۇ مۇكەممەللەشتۈرىدۇ. قانۇن-بەلگىلىمە بويىچە تولۇقلىما بېرىش ئۇچۇرىنى ئاشكارىلاپ، «بىرلا رەسمىيەت بىلەن بېجىرىش» ئۇسۇلىنى قوللىنىپ، تولۇقلىما مەبلىغىنى ۋاقتىدا ئەمەلىي ئاشلىق تېرىغان دېھقانلارنىڭ قولىغا يەتكۈزۈش كېرەك.
مالىيە مىنىستىرلىقى مۇنۇلارنى تەلەپ قىلدى: جايلار دىققىتىنى ئەمەلىي ئاشلىق تېرىيدىغان دېھقانلارغا مەركەزلەشتۈرۈشى، تەشكىلىي رەھبەرلىكنى كۈچەيتىشى، تارقىتىش مېخانىزمىنى مۇكەممەللەشتۈرۈشى، مەبلەغنى نازارەت قىلىپ باشقۇرۇشنى كۈچەيتىشى، سىياسەت تەشۋىقاتىنى ياخشى ئىشلىشى، تېزدىن تولۇقلىما بېرىپ، ئاشلىق تېرىيدىغان دېھقانلارنىڭ ئېرىشىش تۇيغۇسىنى ھەقىقىي ئۆستۈرۈشى كېرەك. مالىيە مىنىستىرلىقى ئالاقىدار تارماقلار بىلەن بىرلىكتە مەبلەغنى نازارەت قىلىپ باشقۇرۇشنى ھەقىقىي كۈچەيتىپ، يەرلىكنىڭ ياردەم پۇلى تارقىتىش خىزمىتىنى ياخشى ئىشلىشىگە ھەيدەكچىلىك ۋە يېتەكچىلىك قىلىپ، ياردەم پۇلىنى تېزدىن ئەمەلىي ئاشلىق تېرىيدىغان دېھقانلارغا تارقىتىپ بېرىدۇ.
مەنبە: جۇڭگو رادىيو تورى سالونىدىن ئېلىندى.
