تۈپى ئۆزگەرگەن ۋىرۇسنىڭ تارقىلىش سۈرئىتى كىشىنى ھەيران قالدۇرىدۇ- 大数跨境

تۈپى ئۆزگەرگەن ۋىرۇسنىڭ تارقىلىش سۈرئىتى كىشىنى ھەيران قالدۇرىدۇ

NepKan

2021-11-29

导读：دۇنيا سەھىيە تەشكىلاتى ھەرقايسى دۆلەتلەردىن نازارەت قىلىش ۋە ئۆلچەش خىزمىتىنى كۈچەيتىشنى تەلەپ قىلدى

يېقىندا ئافرىقىدىكى نۇرغۇن دۆلەتلەردە بايقالغان تۈپى ئۆزگەرگەن يېڭى تاجسىمان ۋىرۇس ھەرقايسى دۆلەتلەرنىڭ يۈكسەك ھوشيارلىقىنى قوزغىدى. شۇ يەر ۋاقتى 26-نويابىر، دۇنيا سەھىيە تەشكىلاتى جىددىي يىغىن ئاچقاندىن كېيىن بايانات ئېلان قىلىپ، بۇ خىل يېڭى تاجسىمان ۋىرۇسنىڭ ئۆزگەرگەن تۈپى B.1.1.529نى «دىققەت قىلىشقا تېگىشلىك ئۆزگەرگەن تۈپ» قاتارىغا كىرگۈزدى ھەمدە ئۇنىڭغا ئومىكرون (Omicron) دەپ نام بەردى.
دۇنيا سەھىيە تەشكىلاتى باياناتىدا مۇنداق دەپ كۆرسەتتى: جەنۇبىي ئافرىقا 24-نويابىر تۇنجى قېتىم بۇ تۈپى ئۆزگەرگەن ۋىرۇسنى دۇنيا سەھىيە تەشكىلاتىغا دوكلات قىلدى، بۇ تۈپى ئۆزگەرگەن ۋىرۇستىن يۇقۇملانغان تۇنجى ئەۋرىشكىنىڭ ئېلىنغان ۋاقتى 9-نويابىر ئىكەن. بۇ تۈپى ئۆزگەرگەن ۋىرۇستا زور مىقداردىكى تۇيۇقسىز ئۆزگىرىش ئەھۋاللىرى مەۋجۇت بولۇپ، ئۇنىڭ بەزىلىرى كىشىنى ئەندىشىگە سالىدۇ. دەسلەپكى تەتقىقاتلاردىن مەلۇم بولۇشىچە، باشقا «دىققەت قىلىشقا تېگىشلىك ئۆزگەرگەن تۈپ»لەرگە سېلىشتۇرغاندا، بۇ ئۆزگەرگەن تۈپ ئادەم بەدىنىنىڭ ۋىرۇس بىلەن تەكرار يۇقۇملىنىش خەۋپىنى ئاشۇرۇۋېتىدىكەن. نۆۋەتتە، جەنۇبىي ئافرىقىنىڭ ھەرقايسى ئۆلكىلىرىدە بۇ تۈپى ئۆزگەرگەن ۋىرۇستىن يۇقۇملانغان بىمارلارنىڭ سانى ئاشماقتا.

تېببىي مۇتەخەسسىسلەر تۈپى ئۆزگەرگەن يېڭى تاجسىمان ۋىرۇس ئامېرىكىدا تارقىلىپ كەتكەن بولۇشى مۇمكىن، دەپ ئەندىشە قىلماقتا

ئامېرىكىنىڭ يېڭى تاجسىمان ۋىرۇسنىڭ گېن تەرتىپىنى ئۆلچەش جەھەتتىكى خىزمەتلىرى ئۇزۇندىن بۇيان ئاستا بولدى، تېببىي مۇتەخەسسىسلەر يېڭى تاجسىمان ۋىرۇسنىڭ ئۆزگەرگەن تۈپى ئومىكرون ئامېرىكا تەۋەسىدە ئاللىقاچان تارقىلىپ كەتكەن بولۇشى مۇمكىن، دەپ ئەندىشە قىلىشتى. ئۇنىڭ ئۈستىگە يېقىندا ئامېرىكىدا بايرام ۋە دەم ئېلىش كۈنلىرى سەۋەبىدىن سەپەرگە چىقىش يۇقىرى دولقۇنى كۆتۈرۈلۈپ، ئاممىنىڭ كەڭ كۆلەملىك يىغىلىش ھەرىكەتلىرى كۆپەيدى، بۇ كۆپ خىل ئامىللار بىلەن قوشۇلۇپ، ئامېرىكا تېببىي مۇتەخەسسىسلىرىنىڭ ئامېرىكىدىكى يۇقۇم ئەھۋالىدىن ئەنسىرىشىگە سەۋەب بولدى.

يېقىنقى ئىككى ھەپتىدىن بۇيان، ئامېرىكىدا يۇقۇمغا ئائىت سانلىق مەلۇماتلاردا كۆرۈنەرلىك ئۆرلەش ۋەزىيىتى كۆرۈلدى. ئامېرىكا كېسەللىكلەرنىڭ ئالدىنى ئېلىش-تىزگىنلەش مەركىزىنىڭ سانلىق مەلۇماتىدا كۆرسىتىلىشىچە، 25-نويابىرغا قەدەر، ئامېرىكىدا يەتتە كۈن ئىچىدە كۈنىگە ئوتتۇرا ھېساب بىلەن 94 مىڭ كىشى يۇقۇملانغان بولۇپ، ئالدىنقى ئايدىكى ئوخشاش مەزگىلدىكىدىن %47 ئاشقان.

بۇنىڭدىن باشقا، مۇتەخەسسىسلەر يەنە ئامېرىكىدىكى يېڭى تاجسىمان ۋىرۇسنىڭ گېن تەرتىپىنى ئۆلچەش خىزمىتىنىڭ ئۇزۇندىن بۇيان ئاستا بولۇۋاتقانلىقىدىن ئەندىشە قىلدى. يېقىندا جەنۇبىي ئافرىقا قاتارلىق دۆلەتلەردە بايقالغان يېڭى تاجسىمان ۋىرۇسنىڭ ئۆزگەرگەن تۈپى Omicron (ئومىكرون) ئامېرىكا چېگراسى ئىچىگە تارقىلىپ كەتكەن بولۇشى مۇمكىن.

بېل تېببىي شۆيۈەنىنىڭ پىروفېسسورى پېتېر خوتىز: بىز ۋىرۇس گېنىنى ئۆلچەش جەھەتتە تازا ئاكتىپ بولالمىدۇق، شۇڭا بىرەيلەن تۈپى ئۆزگەرگەن ۋىرۇس ئامېرىكىغا تارقىلىپ كەتتى دېسە، مەن ھەرگىز ھەيران قالمايمەن.

تۈپى ئۆزگەرگەن ۋىرۇس قەيەردىن كەلگەن؟ پەن تەتقىقات خادىملىرى ئۇنىڭ مەنبەسىنى تەتقىق قىلماقتا

تۈپى ئۆزگەرگەن ۋىرۇس ئومىكروننىڭ تارقىلىش دائىرىسىنىڭ ئۈزلۈكسىز كېڭىيىشىگە ئەگىشىپ، پەن تەتقىقات خادىملىرى ئۇنىڭ مەنبەسى ھەققىدىكى تەتقىقاتلارنى قانات يايدۇردى. ئەنگلىيە لوندون داشۆسىنىڭ بىيولوگىيە پىروفېسسورى فرانسوۋا باللۇ تەھلىل قىلىپ مۇنداق دېدى: ئۆزگەرگەن تۈپ Omicron (ئومىكرون)دا بىر قاتار بىنورمال ئۆزگىرىشلەر بار بولۇپ، بۇ ئۆزگىرىشلەر بەلكىم ئىممۇنىتېت كۈچى تۆۋەن مەلۇم بىمارنىڭ ئاستا خاراكتېرلىك يۇقۇملىنىشى مەزگىلىدە يۈز بەرگەن بولۇشى مۇمكىن، ياكى داۋالانمىغان مەلۇم بىر ئەيدىز بىمارىدىن كەلگەن بولۇشىمۇ مۇمكىن.

تۈپى ئۆزگەرگەن ۋىرۇسنىڭ خەۋپ-خەتىرىنى باھالاش ئۈچۈن يەنىلا تېخىمۇ كۆپ تەجرىبە سانلىق مەلۇماتى بولۇشى كېرەك

دېلتا ۋىرۇسىغا سېلىشتۇرغاندا، تۈپى ئۆزگەرگەن ۋىرۇس «ئومىكرون»نىڭ خەتىرى زادى قانچىلىك؟ تېخىمۇ كەڭ دائىرىدە تارقىلامدۇ؟

بۈگۈنكى رۇسىيە تېلېۋىزىيە ئىستانسىسىنىڭ خەۋىرىگە قارىغاندا، نۆۋەتتە تۈپى ئۆزگەرگەن ۋىرۇس Omicron (ئومىكرون) ئافرىقا ۋە ئافرىقىنىڭ سىرتىدىكى رايونلاردا كىشىنى ھەيران قالدۇرىدىغان سۈرئەتتە تارقىلىۋېتىپتۇ.

جەنۇبىي ئافرىقىنى مىسالغا ئالساق، يېقىندا جەنۇبىي ئافرىقا خادېن ئۆلكىسىدىكى يېڭىدىن كۆپەيگەن يۇقۇملانغۇچىلارنىڭ %90ى مۇشۇ تۈپى ئۆزگەرگەن ۋىرۇس بىلەن مۇناسىۋەتلىك ئىكەن. نۇرغۇن غەرب تاراتقۇلىرىنىڭ قارىشىچە، Omicron (ئومىكرون) نۆۋەتتە پۈتۈن يەر شارىدا مەۋجۇت بولۇپ تۇرۇۋاتقان ئەڭ خەتەرلىك تۈپى ئۆزگەرگەن ۋىرۇس ئىكەن.

تەتقىقاتچىلار مۇنۇلارنى بىلدۈردى: بۇلتۇر 10-ئايدا ھىندىستاندا بايقالغان ئۆزگەرگەن ۋىرۇس تۈپى دېلتانىڭ گېن گۇرۇپپىسىدا جەمئىي 15 ئورۇندا تۇيۇقسىز ئۆزگىرىش يۈز بەرگەن، دۇنيا سەھىيە تەشكىلاتى بۇ يىل 5-ئايدا ئۇنى «دىققەت قىلىشقا تېگىشلىك ئۆزگەرگەن تۈپ» قاتارىغا كىرگۈزگەن. دەسلەپكى تەتقىقاتتىن بايقىلىشىچە، ئوخشاشلا دۇنيا سەھىيە تەشكىلاتى تەرىپىدىن «دىققەت قىلىشقا تېگىشلىك ئۆزگەرگەن تۈپ» دەپ قارالغان Omicron (ئومىكرون) دېلتاغا قارىغاندا تېخىمۇ كۆپ ئۆزگىرىش ھاسىل قىلغان بولۇپ، نۆۋەتتە بۇ ئۆزگەرگەن تۈپنىڭ گېن گۇرۇپپىسىدا ئاز دېگەندىمۇ 32 ئورۇندا تۇيۇقسىز ئۆزگىرىش يۈز بەرگەنلىكى مەلۇم بولدى، زور مىقداردىكى تۇيۇقسىز ئۆزگىرىش ھازىرقى يېڭى تاجسىمان ۋىرۇس ۋاكسىنىسىنىڭ ئۈنۈمىنى ئاجىزلاشتۇرۇۋېتىدىغانلىقىدىن دېرەك بېرىدۇ، ئۇنىڭ ئۈستىگە بۇ ئۆزگەرگەن تۈپ تېخىمۇ كۈچلۈك يۇقۇشچانلىققا ئىگە بولۇشى مۇمكىن.

دۇنيا سەھىيە تەشكىلاتىنىڭ بىر ئەمەلدارى مۇنداق دېدى: نۆۋەتتە بۇ يېڭى ئۆزگەرگەن ۋىرۇس تۈپى ھەققىدە بىلىدىغانلىرىمىز ناھايىتى ئاز بولۇپ، ئۇنىڭ يۇقۇشچانلىقى ۋە ۋاكسىنىغا تاقابىل تۇرۇش خۇسۇسىيىتىنى باھالاشتا، يەنىلا تېخىمۇ كۆپ تەجرىبە سانلىق مەلۇماتلىرىغا ئېھتىياجلىقمىز.

دۇنيا سەھىيە تەشكىلاتى ھەرقايسى دۆلەتلەردىن نازارەت قىلىش ۋە ئۆلچەش خىزمىتىنى كۈچەيتىشنى تەلەپ قىلدى

يېڭى تاجسىمان ۋىرۇسنىڭ بۇ ئۆزگەرگەن تۈپىدىن قانداق مۇداپىئەلىنىمىز؟ نۆۋەتتە دۇنيا سەھىيە تەشكىلاتى ھەرقايسى دۆلەتلەردىن تەكشۈرۈش ۋە ئۆلچەش خىزمىتىنى كۈچەيتىشنى تەلەپ قىلدى. ھەرقايسى دۆلەتلەرگە ھازىر كەڭ تارقىلىۋاتقان ۋىرۇس تۈپلىرىنى كۆزىتىش ۋە ئۆلچەشنى كۈچەيتىپ، ئوچۇق سانلىق مەلۇمات ئامبىرىغا مۇكەممەل بولغان ۋىرۇس گېن گۇرۇپپىسى تەرتىپى ۋە مېتا مەلۇماتلىرىنى تاپشۇرۇشنى ھەمدە «دىققەت قىلىشقا تېگىشلىك» تۈپى ئۆزگەرگەن ۋىرۇسقا مۇناسىۋەتلىك دەسلەپكى بىمارلار توغرىسىدا دوكلات سۇنۇشنى مۇراجىئەت قىلدى.

دۇنيا سەھىيە تەشكىلاتى يەنە خەلقئارا ھەمكارلىقنى قانات يايدۇرۇپ، نەق مەيداندا تەكشۈرۈش ۋە تەجرىبىخانىدا باھالاش ئارقىلىق «دىققەت قىلىشقا تېگىشلىك» تۈپى ئۆزگەرگەن ۋىرۇسنىڭ ھەر جەھەتتىكى تەسىرىنى تېخىمۇ ئېنىق ئىگىلەش تەكلىپىنى بەردى.

شۇنىڭ بىلەن بىر ۋاقىتتا، بەزى دۆلەتلەر بۇ خىل تۈپى ئۆزگەرگەن ۋىرۇستا دېلتا ۋىرۇس تۈپىدىن كېيىن يېڭى بىر قېتىملىق شىددەتلىك يۇقۇمنى كەلتۈرۈپ چىقىرىشىدىن ئەنسىرىدى، ھازىرغىچە تەخمىنەن 20 دۆلەت ئارقا-ئارقىدىن جەنۇبىي ئافرىقا دۆلەتلىرىدىن كېلىدىغان نۆۋەتچى ئايروپىلان ۋە يولۇچىلارنىڭ چېگرادىن كىرىشىنى چەكلەش تەدبىرىنى ئېلان قىلدى ياكى چەكلەش تەدبىرلىرىنى چىقىرىشقا تەييارلىق قىلدى.

مەنبە: جۇڭگو رادىيو تورى ئۇيغۇرچە سالونىدىن ئېلىندى.

مۇناسىۋەتلىك يازمىلار:

1. ئۆزگەرگەن ۋىرۇس زەھەرلىك تۈپى ئومىكرون پۈتۈن يەر شارىغا تارقالدى

2. يېڭى ۋىرۇس: پۈتۈن يەر شارى جىددىيلىشىپ كەتتى!

-----

تەۋسىيە كىتاب: شۆ جاۋفېڭ «ئىقتىساد تەپەككۇرى»

ئەگەر مەزكۇر كىتابنىڭ تولۇق مەزمۇنىغا قىزىقسىڭىز تۆۋەندىكى ئىككىلىك كودنى سىكاننېرلاپ مەزكۇر كىتابنىڭ ئۇيغۇرچە ئېلېكىتىرونلۇق نۇسخىسىنى ئوقۇڭ!