بۇ ئىشلاردا بەك ئاقكۆڭۈل بولۇپ كەتمەڭ!

يېقىندا چۈەنجۇ شەھىرى چۈەنگاڭ رايونىدىكى ساقچىلار ئارقا-ئارقىدىن دېلو مەلۇماتى تاپشۇرۇپ ئالغان. مەلۇماتتا دېيىلىشىچە، ئالدامچىلار ئۈندىداردا يېقىن دوست قىياپىتىگە كىرىۋېلىپ ئالدامچىلىق قىلىپ، ئۈندىداردىكى پۇلنىڭ ھەممىسىنى يۆتكەپ كەتكەن.

ساقچىلار تەكشۈرۈش ئارقىلىق، بۇنىڭ يېڭى شەكىلدىكى ئالدامچىلىق ئىكەنلىكىنى، ئالدامچىلارنىڭ «بېلىق تۇتۇش» شەكلىدە ساختا ئىككىلىك كود ئەۋەتىپ زىيانغا ئۇچرىغۇچىنىڭ ئۈندىدار ھېساباتىنى ئالداپ ئېلىۋېلىپ، ئۈندىدار ھېسابات نومۇرىدىكى پۇلنى ئوغرىلاپ كەتكەنلىكىنى بايقىغان.

1- دېلو مىسالى 

15-فېۋرال چۈشتىن كېيىن، چۈەنگاڭ رايونى فېڭشەن كەنتىدە ئولتۇرۇشلۇق شياۋ جاڭ «ساۋاقدىشى»نىڭ QQ ئۇچۇرىنى تاپشۇرۇپ ئالغان، ئۇ «ساۋاقدىشى» ئۇنىڭغا ئۈندىدارىغا چىقالمايۋاتقانلىقىنى، ئۈندىدارغا نورمال چىقىشى ئۈچۈن ئۈندىداردىكى دوستلىرىنىڭ سۇپىدىن كەلگەن ئۇچۇرنى دەلىللىشىگە موھتاج ئىكەنلىكىنى ئېيتقان. ئۇ «ساۋاقدىشى» شياۋجاڭنى ئىشەندۈرۈش ئۈچۈن، ئۇنىڭ بىلەن ئاۋازلىق پاراڭلاشقان. شياۋجاڭ ئۇنىڭغا ئىشىنىپ تەلەپ بويىچە ئۇ يوللىغان ئىككىلىك كودنى سىكاننېرلاپ، ئۈندىدارغا مۇناسىۋەتلىك ئۇچۇرلارنى تولدۇرغان ھەمدە ئۈندىداردىن چېكىنىپ چىققان.

ئارقىدىن، ئۇ «ساۋاقدىشى» تولدۇرغان ئۇچۇرلاردا خاتالىق بار ئىكەن دەپ شياۋجاڭدىن تېلېفونىغا كەلگەن بىر دەلىللەش قىسقا ئۇچۇرىنى ئەۋەتىپ بېرىشنى ھەمدە ئۈندىدار ھېساباتىنىڭ توڭلىتىۋېتىلىشىدىن ساقلىنىش ئۈچۈن تەكشۈرۈش مەزگىلىدە ئۈندىدارغا چىقماسلىقنى تەلەپ قىلغان. يېرىم سائەتتىن كېيىن، شياۋجاڭ ئۈندىدارىغا چىقىپ، ھېساباتىدىكى 1279 يۈەننىڭ پۈتۈنلەي يۆتكەپ كېتىلگەنلىكىنى بايقىغان. ئەسلىدە، ئالدامچى بۇ ئىشتىن بۇرۇن شياۋجاڭنىڭ بىر ساۋاقدىشىنىڭ QQ نومۇرىنى ئوغرىلىغان، ئاندىن ئۇنىڭ قىياپىتىگە كىرىۋېلىپ ئالدامچىلىق قىلغانىكەن.

2- دېلو مىسالى 

16-فېۋرال چۈشتىن كېيىن، چۈەنگاڭ رايونى چيەنشاۋ كەنتىدىكى شياۋچېنمۇ مۇشۇ خىلدىكى ئالدامچىلىققا ئۇچرىغان، ئالدامچى ئۇنىڭ بىر دوستىنىڭ QQ نومۇرىنى ئوغرىلاپ ئېلىۋالغان، ئاندىن ئۇنىڭغا ئۇچۇر يوللاپ ئۈندىدارىغا نورمال چىقالمايۋاتقانلىقىنى، بۇنىڭ ئۈچۈن دوستىنىڭ دەلىللىشىگە ئېھتىياجلىق ئىكەنلىكىنى ئېيتىپ، شياۋچېننى ئىككىلىك كودنى سىكاننېرلاش، ھېسابات نومۇرى شىفىرىنى كىرگۈزۈش، قىسقا ئۇچۇر يوللاش قاتارلىق قەدەم-باسقۇچلارنى ئورۇنلاشقا يېتەكلىگەن ھەمدە شۇ ئارقىلىق شياۋچېننىڭ ئۈندىدارىنى ئوغرىلاپ كېتىپ، شياۋچېننىڭ ئۈندىدارىدىكى 1790 يۈەن پۇلنى تېلېفونغا قىممەت تولۇقلاش، Q  پۇلى سېتىۋېلىش قاتارلىق ئۇسۇللار بىلەن خەجلەپ تۈگەتكەن.

3- دېلو مىسالى 

15-فېۋرال چۈشتىن كېيىن، چۈەنگاڭ رايونى شەنياۋ كوچىسىدا ئولتۇرۇشلۇق شياۋجۇاڭ «ساۋاقدىشى» شياۋخۇنىڭ QQ ئۇچۇرىنى تاپشۇرۇپ ئالغان، «ساۋاقدىشى» ئۇنىڭغا ئۆزىنىڭ ئۈندىدارىغا مۇناسىۋەتلىك ئۇچۇرنى جەزملەشتۈرۈپ بېرىشنى ئېيتقان. شياۋجۇاڭ قارشى تەرەپنىڭ تەلىپى بويىچە ئىككىلىك كودنى سىكاننېرلىغاندىن كېيىن، ئۆزىنىڭ ئۈندىدار ھېسابات نومۇرى، مەخپىي نومۇرى قاتارلىق ئۇچۇرلارنى ئۇنىڭغا تولدۇرغان. ئارقىدىن ئالدامچى ئۇنىڭدىن ئۈندىدار ھېساباتىنىڭ توڭلىتىۋېتىلىشىدىن ساقلىنىش ئۈچۈن ئۈندىدارغا يېرىم سائەت ئىچىدە چىقماسلىقنى ئېيتقان. ئالدامچى شياۋجۇاڭنىڭ ئۈندىدارىغا كىرگەندىن كېيىن، ئۇنىڭ ئۈندىدارىدىكى 100 يۈەندىن ئارتۇق پۇلنى يۆتكەپ كېتىپلا قالماستىن، يەنە شياۋجۇاڭنىڭ نامىدا ئۇنىڭ ھاممىسىدىن پۇل قەرز ئېلىپ، شياۋجۇاڭ ۋە ئۇنىڭ ھاممىسىنى جەمئىي 1519 يۈەن زىيانغا ئۇچراتقان.

ساقچىلار ئەسكەرتىدۇكى: 

بۇ خىل ئالدامچىلىق ھىيلىسى قارىماققا ئاددىي كۆرۈنسىمۇ، ئۇنىڭ قايمۇقتۇرۇش كۈچىگە سەل قاراشقا بولمايدۇ، ھازىرغىچە نۇرغۇن كىشىلەر بۇ تۇزاققا چۈشۈپ كەتتى. شۇڭا كۆپچىلىكنىڭ پايدىلىنىشى ئۈچۈن تۆۋەندىكى ئۈچ تەدبىرنى رەتلەپ چىقتۇق:

1. ئىدىيەدە ئالدىنى ئېلىش تەييارلىقى بولۇشى كېرەك

دوستلار قەرز پۇل سوراش، قوشۇمچە دەلىللەش ئۇچۇرىنى تەلەپ قىلىش قاتارلىق ئەھۋاللارغا يولۇققاندا، تېلېفون قىلىش، سىنلىق كۆرۈشۈش ياكى يۈزتۇرا پاراڭلىشىش قاتارلىق ئۇسۇللار ئارقىلىق ئۇ دوستنىڭ راست-يالغانلىقىنى دەلىللەش، ئەھۋالنى ئېنىق تەكشۈرۈپ بىلىش، ھەرگىزمۇ ئالدىراپ پۇل يۆتكىمەسلىك كېرەك.

2. بىخەتەرلىك ئەسكەرتمىسىگە سەل قارىماسلىق كېرەك

ئۈندىدار سۆھبەت كۆزنىكىدە خەۋپ-خەتەر ئەسكەرتمىسى كۆرۈلگەندە، شۇ دوستىنىڭ ھېسابات نومۇرىنىڭ ئوغرىلىنىش ئېھتىماللىقىدىن ھوشيار بولۇش كېرەك، ئەگەر ئۇ ھېسابات نومۇرى راستتىنلا ئوغرىلانغان بولسا، دەرھال دوستى بىلەن ئالاقىلىشىپ، ھېسابات نومۇرىنى توڭلىتىۋېتىشنى ئېيتىش ھەمدە باشقا دوستلارغا يەتكۈزۈپ، تېخىمۇ كۆپ كىشىلەرنىڭ ئالدىنىپ قېلىشىدىن ساقلىنىش كېرەك.