كونىلاردا «بايلىق مەينەت ئىشىكتىن كىرمەيدۇ» دېگەن گەپنىڭ ئاساسى بار. بىر ئايالنىڭ تۇرمۇش كەچۈرۈشنى بىلىدىغان-بىلمەيدىغانلىقىغا قاراشتا، ئۇنىڭ سىرتقا چىققاندا قانداق سومكا ئېسىۋالغانلىقى، قانچىلىك قىممەت باھالىق لەۋ سۇرۇخ سۈرگەنلىكىگىلا قارىماڭ، ئۇنداق چىرايلىق كۆرۈنۈشلەرنىڭ كۆپىنچىسى باشقىلارغا كۆرسىتىش ئۈچۈندۇر.
بەزى قىزلار سىرتتا چىرايلىق يۈرسە، ئۆيگە قايتقاندا ئايىغىنى ئىشىك ئالدىغا خالىغانچە تېپىپ قويىدۇ، ئېشىپ قالغان قاچىلارنى سۇ ئوقۇرىغا دۆۋىلەپ قويسا بىر نەچچە كۈن تۇرىدۇ، كىيىم-كېچەكلىرىنى سافاغا، كارىۋاتنىڭ ھەممە يېرىگە تاشلاپ قويىدۇ، ھەتتا پۇت قويغۇدەك يەرمۇ يوق. بۇ خىل «نەپىسلىك»ئۇزاققا بارمايدۇ، ئىشىكنى ئېچىشىمىزغىلا ھەممە نەرسە ئاشكارىلىنىپ قالىدۇ.
ئۆزىگە ھەقىقىي ئەھمىيەت بېرىدىغان ئاياللارنىڭ قەلبىدە تەلەپچانلىق بولىدۇ.
سىز ئۇنى پەقەت پاكىزلىقنى سۆيىدۇ دەپ قارامسىز؟ئەمەلىيەتتە ئۇنىڭ يىغىشتۇرغىنى نەدىمۇ ئۆي بولسۇن، بەلكى قالايمىقان تۇرمۇش.
پىسخولوگىيەدە بىر «بۇزۇلغان دېرىزە ئۈنۈمى» بار بولۇپ، ئۇنىڭدا دېيىلىشىچە، ئەگەر مۇھىت قالايمىقان بولسا، ئادەمنىڭ كەيپىياتىنىڭمۇ ياخشىلىنىشى تەسكە توختايدىكەن. ئۆينىڭ ھەممە يېرىدە كېرەكسىز نەرسىلەر بولغاچقا، ئىشىكتىن كىرىپلا قارىسا كىشىنىڭ ئىچى پۇشىدۇ، خىزمەتتە باش قاتۇرىدىغان ئىشلار ئەسلىدىنلا كۆپ بولغاچقا، ئۆيگە قايتقاندا نەپەس ئالالماي، كەيپىيات تەبىئىي ھالدا بارغانسېرى ناچارلىشىدۇ.
بىر ئائىلە كىشىلىرى پاكىز رەتلىك مۇھىتتا تۇرسا، ئۇيقۇسى ياخشى بولۇپ، پۈتۈن ئائىلە ئازادە كەيپىياتقا چۆمىدۇ.
پاكىز ئائىلىدە چوڭ بولغان بالىلار كىچىكىدىن تارتىپلا قۇلىقىغا سىڭىپ قالغاچقا، ئىشنى تېخىمۇ تەرتىپلىك قىلىدۇ، مىجەزى كۆپ ھاللاردا ئوچۇق-يورۇق ھەم ئۆزىگە ئىشىنىدۇ. پۈتۈن ئائىلىنىڭ تەقدىرى ئەمەلىيەتتە ھەر كۈنى يىغىشتۇرۇش ئىچىدە ئاستا-ئاستا ياخشىلىنىدۇ.
شۇڭا، ئەگەر ئەتراپىڭىزدا پاكىزلىقنى سۆيىدىغان، دائىم بىكار تۇرالمايدىغان، ئۆي يىغىشتۇرۇشقا ئامراق ئايال بولسا، ئۇنى ئاۋارىچىلىق دەپ ئاغرىنماڭ، ئۇنى قۇسۇر ئىزدەۋاتىدۇ دەپ ئويلىماڭ. ئۇنىڭ سۈرتكىنى ئۈستەل ئەمەس، سۈرتكىنى يەر ئەمەس، بەلكى بۇ ئائىلىنىڭ بەخت-سائادىتىنى ساقلاپ، قالايمىقان باش قېتىنچىلىقلىرىنى ئىشىك سىرتىدا قالدۇرۇش. بۇنداق ئادەمنى ياخشى قەدىرلەش كېرەك.
