-قانداق ئادەمنىڭ دوستى ئەڭ كۆپ؟ بۇ مەسىلە ھەمىشە كىشىلەرنىڭ قىزغىن مۇنازىرىسىنى قوزغايدىغاندەك قىلىدۇ. ئىجتىمائىي ئالاقە تورى يۈكسەك تەرەققىي قىلغان بۈگۈنكى كۈندە، بىز دائىم بەزى كىشىلەرنىڭ ئەتراپىدا نۇرغۇن «دوست»لارنىڭ بارلىقىنى كۆرىمىز، ئۇلار تۇغۇلۇشىدىنلا بار بولغان ئىجتىمائىي ئالاقە سېھرىي كۈچىگە ئىگە بولۇپ، ناتونۇش كىشىلەر بىلەن تېزلا تونۇشۇپ، كۆزنى يۇمۇپ ئاچقۇچە باشقىلارنىڭ ئاغزىدىكى «ياخشى دوست»ياكى «يېقىن ئاغىنە»گە ئايلىنىدۇ. بىراق، قارىماققا قىزىپ كەتكەن بۇ كىشىلىك مۇناسىۋەتلەرنىڭ ئارقىسىدا ھەقىقىي دوستلۇق زادى قانچىلىك نىسبەتنى ئىگىلەيدۇ؟
ئىجتىمائىي ئالاقە سورۇنىدا بېلىق سۇغا ئېرىشكەندەك ئەركىن يۈرىدىغان كىشىلەر ھەمىشە بىر يۈرۈش «ئىجتىمائىي ئالاقە ماھارىتى»نى ئىگىلىگەن بولىدۇ: ئۇلار ئوخشاش بولمىغان كىشىلەرنىڭ ئالدىدا ئوخشاش بولمىغان قىياپەتنى نامايان قىلىشنى بىلىدۇ، قارشى تەرەپنىڭ قىزىقىشىنى دەل جايىدا تۇتۇپ، يۈزەكى يېقىن مۇناسىۋەتنى تېز سۈرئەتتە ئورنىتالايدۇ. بۇ خىل «ئادەمنى كۆرسە ئادەمگە گەپ قىلىش، ئالۋاستىنى كۆرسە ئالۋاستىغا گەپ قىلىش» ماھارىتى ئۇلارنى قىسقا ۋاقىت ئىچىدە نۇرغۇن «دوست»قا ئىگە قىلىدۇ. ئۇلار خۇددى ئىجتىمائىي ئالاقە سەھنىسىدىكى ئارتىسلارغا ئوخشاش، قانداق سورۇندا قانداق گەپ قىلىش، قانداق چىراي ئىپادىسى قىلىشنى بىلىپ، ئەتراپىدىكى كىشىلەرنى خۇشال ۋە راھەت ھېس قىلدۇرىدۇ.
لېكىن ئىجتىمائىي ئالاقىنىڭ ماھىيىتى كۆڭۈل قويۇپ لايىھەلەنگەن ئويۇن ئەمەس، بەلكى سەمىمىي ھېسسىيات ئالماشتۇرۇش بولۇشى كېرەك. بىر مەزگىللىك مۇناسىۋەت مەقسەتلىك ياخشىچاق بولۇش ۋە يۈزەكى ماسلىشىش ئۈستىگە قۇرۇلغاندا، ئۇ دوستلۇقنىڭ ئەڭ يادرولۇق قىممىتىنى يوقىتىدۇ.
ھەقىقىي دوستلۇق نىقابلىنىشقا، مەقسەتلىك ساقلاشقا موھتاج ئەمەس، بەلكى ئىككى مۇستەقىل روھ ئارىسىدىكى ئۆزئارا جەلپ قىلىش ۋە چۈشىنىشتۇر. ھەقىقىي دوستلار ئارىسىدا، ئالاقىلاشمىغىلى ناھايىتى ئۇزاق بولغان تەقدىردىمۇ، قايتا كۆرۈشكەندە يەنىلا كۆڭلىدىكىنى ئوچۇق ئېيتىشىدۇ؛ پىكىر بىردەك بولمىغان تەقدىردىمۇ، بىر-بىرىگە سەمىمىي مۇئامىلە قىلىدۇ، ساختىپەزلىك بىلەن ھەمدەم بولمايدۇ.
رېئال تۇرمۇشتا شۇنى بايقىيالايمىزكى، قارىماققا ھەممە يەردە دوستلىرى باردەك كۆرۈنىدىغان كىشىلەر قىيىنچىلىققا يولۇققاندا ھەمىشە يالغۇز قالىدۇ؛ دوستلىرى كۆپ بولمىسىمۇ، ئەمما چىن كۆڭلىدىن مۇئامىلە قىلىدىغان كىشىلەر ھالقىلىق پەيتتە ئەڭ كۈچلۈك قوللاشقا ئېرىشىدۇ. چۈنكى، ھەقىقىي دوستلۇق ۋاقىتنىڭ سىنىقىغا بەرداشلىق بېرەلەيدۇ، ئۇ مەنپەئەت ئالماشتۇرۇش ئاساسىغا قۇرۇلماستىن، بەلكى ئۆزئارا ئىشىنىش ۋە زوقلىنىشتىن كېلىدۇ.
سانى كۆپ «دوست»نى قوغلاشقاندىن كۆرە، كۆڭۈل قويۇپ بىر نەچچە ھەقىقىي سىرداش دوست تۇتقان ياخشى.چۈنكى ئۇزۇنغا سوزۇلغان كىشىلىك ھايات سەپىرىدە، سىز بىلەن خۇشاللىق، غەزەپ، قايغۇ-ھەسرەتتىن تەڭ بەھرىمەن بولالايدىغان، سىز ئېھتىياجلىق بولغاندا ياردەم قولىنى سۇنالايدىغانلار يەنىلا شۇ مەڭگۈ سىزگە چىن كۆڭلىدىن مۇئامىلە قىلىدىغان كىشىلەردۇر.
