ئاپتونوم رايونلۇق سەھىيە پىلانلىق تۇغۇت كومىتېتى يېقىندا «تۇغما غەيرىيلىكنى داۋالاش، قۇتقۇزۇش تۈرى خىزمىتىنى يولغا قويۇش لايىھىسى» نى تۈزدى.بۇنىڭدا ئاپتونوم رايونىمىزدىكى 6 چوڭ تۈردىكى 72 خىل تۇغما غەيرىيلىك كېسىلىگە گىرىپتار بولغان قىيىنچىلىقى بار بىمارلار قۇتقۇزۇش ئويبېكتى قىلىنغان. ئاپتونوم رايونلۇق خەلق دوختۇرخانىسى، شەھەرلىك 1-خەلق دوختۇرخانىسى قاتارلىق ئالتە دوختۇرخانا تۈر خىزمىتى يولغا قويۇلغان نۇقتىلىق دوختۇرخانا قىلىپ بېكىتىلگەن.
ئىگىلىنىشچە، بۇ قېتىم قۇتقۇزۇش دائىرىسىگە كىرگۈزۈلگەن ئالتە تۈرلۈك تۇغما غەيرىي كېسەللىكلەر: نېرۋا سېستىمىسىدىكى تۇغما غەيرىيلىك، ھەزىم قىلىش سېستىمىسىدىكى تۇغما غەيرىيلىك، سۈيدۈك ئاجرىتىش سېستىمىسى ھەمدە جىنسىي ئەزاسىدىكى تۇغما غەيرىيلىك، مۇسكۇل سۆڭەك سېستىمىسىدىكى تۇغما غەيرىيلىك، نەپەس يولى سېستىمىسىدىكى تۇغما غەيرىيلىك، بەش ئەزا ئېغىز قۇرۇلمىلىق غەيرىيلىكنى ئۆز ئىچىگە ئالىدىكەن.
قۇتقۇزۇشنى ئىلتىماس قىلىدىغان بالىلارنىڭ ئالدى بىلەن ئالتە چوڭ تۈردىكى 72خىل تۇغما غەيرىيلىك كېسىلىگە گىرىپدار بولغانلىقىغا دىئاگنوز قويۇلغان بولۇشى؛ يېشى 18 ياشتىن تۆۋەن بولۇشى؛ تۆۋەن تۇرمۇش كاپالەت سوممىسىدىن بەھرىمان بولۇشى؛ تۆۋەن كىرىملىك ئىسپاتى بولۇشى؛ نۇقتىلىق داۋالاش ئاپپاراتىدا دىئاگنوز قويۇش؛ئوپىراتسىيە قىلىش؛ داۋالاش ۋە ئەسلىگە كېلىش ؛داۋالانغاندا ئۆزى تاپشۇرغان داۋالاش ھەققى 3000 يۈەندىن ئاشقانلىق ئىسپاتىنى ھازىرلىنىشى لازىمكەن.
2017-يىلى 1-ئاينىڭ 1-كۈنىدىن كېيىن، نۇقتىلىق دوختۇرخانىلاردا دىئاگنوز قويۇلۇپ، ئوپىراتسىيە قىلىنىپ، داۋالىنىپ، سالامەتلىكىنى ئەسلىگە كەلتۈرۈشكە كەتكەن خىراجەتلەرگە ياردەم قىلىنىدىكەن. بىمارنىڭ داۋالاش ھەققى ئاتچوت قىلىنغاندىن كېيىن، ئۆزى تۆلەيدىغان قىسمىغا بىر قېتىمدا 3000 يۈەندىن 30 مىڭ يۈەنگىچە ياردەم بېرىلىدىكەن.
ئۈندىدار سالونىمىزنى قۇشۇۋىلىڭ
شىنجاڭ يېشىل زېمىن بىيو پەن-تېخنىكا چەكلىك شىركىتى باشقۇرىشىدىكى ئەڭگۈشتەر سالونى ھەربىر ئوقۇرمەننىڭ تېنىگە سالامەتلىك ئائىلىسىگە بەخت تىلەيدۇ