…………
…………
رۇبائىيلار
نۇرمەمەت تۇرسۇن
1
تەنھالىق پەيلىنى ماڭا كۆرسەتمە،
ھەمراھسىز سەيلىنى ماڭا كۆرسەتمە.
بىر قۇچاق سۆيگۈنى چاچاي ئالەمگە،
مەجنۇنسىز لەيلىنى ماڭا كۆرسەتمە.
2
قويۇپ بەر لېۋېڭدە لەۋلىرىمگە مەي،
مەن سېنىڭ قەلبىڭنى مەيخانەم ئېتەي.
دۇنيانىڭ غەملىرى يوقىسۇن بىردەم،
كەل لەۋزىم مەنزىلى، مەن ساڭا يېتەي.
3
يۈگۈرمە ئەجىرسىز نەپنىڭ ئالدىدا،
ئويلانماي قىلىنغان گەپنىڭ ئالدىدا.
جەڭچى بول ئىش- ئەمگەك ئۈچۈن يارالغان،
مۈشكۈلنى يېڭىشتە سەپنىڭ ئالدىدا.
4
قانچىلىك بولسىمۇ قۇشنىڭ پەرۋازى،
يىراققا ئاڭلانماس ھېچ بىر ئاۋازى.
زەررىدەك تۆھپەڭدىن كېرىلىپ يۈرمە،
بەخت شۇ ئەجرىڭدىن ئەل بولسا رازى.
5
بىرى دەر گۈزەللىك نېمىدە مەۋجۇت؟
مەن دەيمەن ھاياتلىق جىمىدە مەۋجۇت.
ئىزلىمە ئەكسىڭنى ئاختۇرۇپ تالاي،
ئۆزلۈگۈڭ سۈيى لىق چىنىدە مەۋجۇت.
6
بۈگۈندىن ئەتىنىڭ تىۋىشى كېلەر،
ھەر بىر تاڭ ئاقىللار قەلبىدە تۈنەر.
ئەتەڭنىڭ غېمىنى بۈگۈندىن كۆرسەڭ،
ئەجرىڭگە ئاسمان ھەم تاغمۇ ئېگىلەر.
تارىم ژۇرنىلى سالوندىن ئېلىندى
ئاستىدىكى ئىنكاس رايۇنىدا كۆرىشەيلى . سۆز قالدۇرۇشنى ئۇنتۇپ قالماڭ