…………
…………
قىزىل يوپۇرماق
رەشىدە سېيىت
سايە تاشلار كۈزگى بۇلۇتلار،
لەپىلدىسە قىزارغان غازاڭ.
مانانلاشقان كەچكى شەپەقتە،
بېغىمدىكى بىرپارچە باراڭ.
ئۇچار قىزغۇچ شەپەق جۇلاسى،
شەبنەم چۈشكەن ئېتىزنى سۆيۈپ.
يەلپۈنىدۇ قىزىل يوپۇرماق،
شاختا تاتلىق خىياللار سۈرۈپ.
تۇپراق قىزغۇچ، قىزارغان بۇلۇت،
قىزىللىققا تولغان بۇ سەھرا.
قۇچاق-قۇچاق گۈللەرنى ئېلىپ،
ئۇچىشىدۇ شاماللار گويا.
يۈرىكىمگە ئەگىشەر تىمتاس،
ئاھ كۈزدىكى قىزىل يوپۇرماق.
مەنمۇ شۇ تاپ مەيىن شامالدەك،
قىزىل ياپراق تەردىم بىر قۇچاق.
بۇلاقلارنىڭ شىلدىرلىشىدا،
مىسرالىرىم قالدى خىيالچان.
تۇيغۇمدىكى تۇنجى لىرىكا،
كۈز قوينىدا بىر گۈزەل ئارمان.
يىراقتىكى دەريا بويىدا،
گۈلگۈن بولدى بارچە دەرەخلەر.
قىزارتىدۇ قارلارنى ئۇلار،
قىزارغان قۇش ھەم ئۇچۇپ كېلەر.
گۇگۇمدىكى قىزىل يوپۇرماق،
تىمتاس قالدى يەنە سەھرادا.
يۈرىكىمنى سېھىرلەپ قويدى،
قىزىل ياپراق چېچىپ نۇر جۇلا.
تارىم ژۇرنىلى سالوندىن ئېلىندى
ئاستىدىكى ئىنكاس رايۇنىدا كۆرىشەيلى . سۆز قالدۇرۇشنى ئۇنتۇپ قالماڭ