ۋەسلىڭ ماڭا نېچۈن كېرەك ئەسلىڭسىز  - ياسىن مەتنىياز

يۆلەنگەنچە مېنى خىيال قىلساڭمۇ،

كۈندەشلىكىم قوزغىلىدۇ تاملارغا.

خانەم ئىچرە مېنى قامال قىلساڭمۇ،

كۈندەشلىكىم قوزغىلىدۇ راملارغا.

شاراب سۇنۇپ ماڭا ئامال قىلساڭمۇ،

كۈندەشلىكىم قوزغىلىدۇ جاملارغا.

يوشۇرارسەن ئۇرغۇۋاتقان قېنىڭنى،

قاغجىراشتا ئايلانساممۇ بىر ئىتقا.

كۈنگە بۆلۈپ ئوينار لېكىن جېنىڭنى،

كۈندەشلىكىم قوزغىلىدۇ ۋاقىتقا.

غايىب قولى سىيلار نازۇك تېنىڭنى،

ماڭا كەلگەن كۈنلەر ئەمما بەك قىسقا.

تالاي كۈنلەر غازاڭ بولدۇم پەسلىڭسىز،

ئېچىلالماي كەلگەچكە سەن ھازىرغا.

ۋەسلىڭ ماڭا نېچۈن كېرەك ئەسلىڭسىز،

مەسۇملۇقۇڭ مۇقەددەستۇر شائىرغا.

غېرىبلىقنى خالىمايمەن ۋەسلىڭسىز،

يولۇقساممۇ تالاي ئابدۇل شاتىرغا.

سادا بېرىپ قىزغىن تۈننىڭ مەرغۇلى،

ئايلانماقتا تاڭدا پۈتەر داستانغا.

سۆڭەكلەردىن چىقىپ مەستلىك بۇلبۇلى،

لەرزان قانات قېقىپ كەتتى ئاسمانغا.

لېرىكىنىڭ ئەۋجى ئۈچۈن بىر يولى

ئايلانمايمەن ئەرزىمەس بىر ھايۋانغا.