مېنى ئىشەندۇر
زەيتۇنەم مەمتىمىن
مېنى ئىشەندۇر
يېڭى ئاينىڭ ھامان تولۇن بولىدىغىنىغا
كېچىلەرنىڭ ئايدىڭسىز قالمايدىغىنىغا
قۇرۇپ كەتكەن دەريا-كۆللەرنىڭ
يامغۇر تىلەپ،شامال تىلەپ،سۇ تىلەپ
ئاسمان بىلەن تۇيۇقسىز خوشلاشمايدىغىنىغا .
مېنى ئىشەندۇر
تىلىڭدىكى بىرىنچى سۆزنىڭ
قەلبىڭدىكى ھەسرەتلىك سىرنىڭ
باھاردىكى ياپيېشىل تۈسنىڭ
ھاياتىڭدا باشقا بىر كۈزنىڭ
ئىسمىمغىلا باغلىق بولىدىغىنىغا .
-كۆزلىرىنى ئۇنتۇمايمەن دېيىشتى ،
- ۋەدىسىدە باغرىم پۈتۈن دېيىشتى .
قوللىرىدا ھارارەت، لەۋلەردىكى سېزىمنى ،
مەنلا ئەمەس ،پۈتۈن ئالەم بىلىشتى .
مەن …
كىچىك ۋاقتىمدا كېپىنەك قوغلاپ باققان ،
توي قىلىپ ،ئۆي ياسىشىپ ئويناپ باققان .
شامالسىز ئاسمانغا لەگلەك ئۇچۇرۇپ ،
لەگلەككە قانات چىقىدىغاندەك ئىشىنىپ باققان .
بىراق ،ئىشەنچنىڭ
داستىخاندىكى ناندەك ئۇلۇغلىغىنى
زېمىندىكى تاغدەك بۈيۈكلىگىنى
گۈل بەرگىدەك نازۇكلىقىنى
قاراڭغۇدەك قورقۇنچلىقىنى ئويلاپ باقمىغان .
ئەپسۇس …
كېپىنەكنى تۇتالمىغاندا چوڭ بولدۇڭ دېيىشتى ،
قوشنامنىڭ ئوغلىدىن ئۇيالغاندا چوڭ بولدۇڭ دېيىشتى .
نەچچە باھار ئۆتتى ،شامال ،بوران ئۇچتى ،
لەگلەك قوغلايدىغان خىياللار مەندىن تېزىشتى .
مەن …
مانا مەن …ئاياغلىرىم بار، يوللىرىم يوق ،
كۆزلىرىم بار ،نۇرلىرىم يوق .
لەۋلىرىم بار ،سۆزلىرىم يوق ،
تىرىك جېنىم بار ،ھاياتىم يوق .
بىر ۋاراققا سۆيگۈ دېگەن خەت يازدىم ،
يېرىم چەمبەر ،كۆڭلۈمدەكلا بوش تۇرار.
ئۈمىد دېگەن بەك يېقىنمىش ئادەمگە ،
ئەمما ماڭا قاپقاراڭغۇ تۇيۇلار .
يالغۇز دېگۈم كەلمەيدىغان يالغۇزمەن ،
تۆت تام ماڭا كۆرسىتىدۇ ئاسماننى .
مەن رەڭگىنى ھامان زەڭگەر ئويلايمەن ،
ئۇنتۇمايمەن ئۇچۇپ ئۆتكەن بىر قۇشنى .
مېنى ئىشەندۇر
سۆيگۈ دېگەن بەختكە
مېنى ئىشەندۇر
سۆيگۈ دېگەن ھەسرەتكە
مېنى ئىشەندۈر
سۆيدۈم دېگەن مەڭگۈگە
مېنى ئىشەندۈر
سۆيگۈ دېگەن ئۈلۈمگە .
مېنى ئىشەندۇر ،ئىشەندۇر مېنى …
