【和志武】Cee Bvl Yeq Bvl 送情死鬼（附东巴唱腔）- 大数跨境

纳西话賨

2020-07-16

导读：温馨提示：Cee Bvl Yeq Bvl东巴唱腔忌讳在家中居室播放，请选择户外，避开家居处所聆听。

【编者按】Cee Bvl Yeq Bvl字面意为送吊死鬼和情死鬼，是大祭风仪式中吟诵众多东巴经的其中一部，用以超度因殉情而亡的青年男女。本文选自和志武编译的《Lv bber Lv Ssaq》(鲁般鲁饶），根据长水村大东巴和泗泉书写的东巴经编译；木琛老师在纳西话賨讲解《鲁般鲁饶》（文末“延伸阅读”可链听）结束时，曾放了和志武老师的Cee Bvl Yeq Bvl东巴唱腔片段供欣赏，本期为完整唱腔，诵词与纳西拼音文对应。后附的《Lv bber Lv Ssaq》前言可助了解相关背景。

温馨提示：Cee Bvl Yeq Bvl东巴唱腔忌讳在家中居室播放，请选择户外，避开家居处所聆听。

“卡冉”战神

Cee Bvl Yeq Bvl

（纳西拼音文：送情死鬼）

Hoq Zheel v nee biai yif

（和志武编译）

E la me sherl bbei tee rheeq ,

Bbi tv me chee ni ,

Yi ddaq chee ddee jjif ;

Biuq gvl sso jil nee ,

Hai sheeq zai liaq ddol ,

Sso yi bi liq muq ,

Mil yi kue kueq kail ,

Cee bvl yeq bvl bbee chee ni .

Zzi jjeq la ler ddiuq ,

Yeq sso yeq mil ddee zzeeq bbei ;

Ngv lv Yeq chel goq ,

Yeq chel lv mei kee ;

Yeq zzee e zzee keq ,

Gel tv Si gua keq yi lei bbeeq mei .

Yeq sso yeq mil nee ni gvl ,

El ni la sherl ni ,

Naq mu bbei dol dee ,

Sso la sso xiq sso e seeq ,

Seeq nee sso haiq yel tee gvl ,

Sso nee me ni jju keel ye ;

Mil la mi xiq mil eq mei ,

Mei nee mil yel gge tee gvl ,

Mil nee me bbaiq jju keel ye .

Zzi jjeq la ler ddiuq ,

La ye perq ddul ddu ,

Ddu yi me ddu nal ,

Me ddu ddu nee bbei si ye .

Yeq zzeeq nee ni gvl ,

Sso yuq mil me see ,

Mil yuq sso me no ,

Yeq zzeeq me see see teel rheeq .

Sso yi lee shuaq to bbuq gv ,

Sseiq shuaq guq nee hiul .

Sso ko lil la keel ,

Mil ko juq keel ye .

Mil la la ler ddiu ddeeq mai ,

Hua huaq guq nee hiul ;

Mil ko bbai ssi lvl ,

Sso hua huaq keel ye .

Sso jji meeq lei ceeq ,

Mil jji ggeq lu shel ;

La ler ddiu ddeeq gv ,

Sso neiq mil go bvl .

Sso nee mil mil ddo ,

Mil sseiq bbee lei shel ;

Mil nee chee lei shel ,

Hua huaq ceeq mvq shel .

Mil nee sso mil ddo ,

Sso sseiq bbee lei shel ;

Sso nee chee lei shel :

Ngv lv jju shuaq gv ,

Yeq pil bbee we lei ,

Naq mo seel heel hee ,

Yeq zzee guaq seiq mei ;

Sso zzee lei ggv ggeq ,

Ddee ggv la me ddoq ,

Zzee shuq ceeq mvq shel .

Ni sso jjiq qil zzee ,

Yeq zzee nee ni gvl ;

Zzee shuq zzee go bvl ,

Shel mei ku zo zoq .

Sso nee lei shel mei ,

Ser sheeq lol ku bbuq ,

Lol bul ceeq nieq nee .

Zzee shuq zzee leel ddeef ,

Ku keel ddu seiq dol ,

Sso lei juq me leq ,

Shel bul ceeq seiq meil !

Mil nee lei shel la ,

Zheel sheeq haiq jji gai ,

Dderq bul ceeq nieq nee ;

Bbuq shuq bbuq go bvl ,

Jji gai tol lv jerq ,

Mil lei juq me leq ,

Shel bul ceeq seiq zeel .

El zzeef la ni gvl ,

Sso la mil ni ye ,

Mil la sso mu seiq ,

Lei juq bbee me taq .

Sso nee lei shel nvl ,

Sso yuq sso ddee cherl ,

Mil yuq mil ddee cherl ,

Teif see waq seiq yil .

Yeq zzee e zeef gge ,

Ngv lv Yeq chel goq ;

Bber zeeq me jjuq goq ,

Bber lerl me hal goq ;

Teeq mei jjiq yi gge ,

Toq mei lv jju gge ,

Bbe mei zzerq zzeeq gge ,

Tee goq bbee laq zeel .

Mil nee lei shel nvl ,

Sso xiq sso e seeq ,

Sso puq hee seiq zeel ,

Sso shuq lee zo waq ;

Mil xiq mil eq mei ,

Mil pil hee ye shel ,

Mil lei meiq zo waq .

Ree perq tvl ko yil ,

Yeq goq me tv nee ;

Sso shuq sso lei ddoq ,

Mil shuq mil lei mai ,

Lei ddoq leel jju pil .

El zzeef ni gvl tee ,

Kee nieq shuq biu keel ,

Laq dol shu erq zee ,

Lei juq lee dder seiq !

Sso nee kuaq ye zeel ,

Mil nee si seiq shel ,

Guaq xi see pei gai leel tvf ;

Guaq xi see peif gge ,

Seel naq lv bie gv ;

Sso yi wai nee cvl ,

Mil yi yiq nee cvl ,

Tee bal gol me taq .

Tee bal leel gol pil ,

Chual ko biq me zeiq ,

Sso jerq biq zo waq ;

Jje maq de me zeiq ,

Mil jerq de zo waq .

Tee dal me ssaf gge ,

Sseeq jjiq naq mei loq ,

Ni mei oq me ddoq ,

Hei mei oq me kail ,

Seel kv leel gul pil ;

Sso yuq zheel sheeq gge ,

Mil yuq zheel lv gge ,

Tee zheel sei seiq zeel !

Tee bal me gol nee ,

Ngv lv Yeq chel goq ,

Yeq goq me tv nee ,

Yeq zzee e zzee pa me ddoq see nee ;

Wu mee wu ddiuf gge ,

Jju shuaq lo shuaq gv ,

Pul cee pul yeq neiq sei ye .

Yi ddaq chee jjif nee ,

Leel gv biu bbiuq ddiul ;

Ngv lv yeq chel goq ,

Yeq zzee e zzee Gel tv si gua ni gvl keq ,

Bvl me yel tee guq ;

Yeq sso yeq mil nee ni gvl ,

Gguq keel cer keel hei me yel .

Hai jjeq la nal see ,

Chee bbei chee ni tv nal see ;

Ggeq nee mee leel kvl ee lei tv ye ,

Meeq nee ddu seiq hei ee lei ssaq ye .

Ree jel ree mil ye ,

Bbai jel bbai qiq ye ,

Bbuq re bbuq ba ye ,

Jjuq nal sheel lo gv ,

O shuq o ddee ye ,

Sheel lo dda jjiq mai ,

Zzei shuq zzei mai ye .

Zeiq chee dder mei la ,

Yi ggvq seeq rhee dee ,

Me gga pv ddeeq tvl ,

Haiq bul cheq tv seiq .

Naq mo bbei dol dee ,

Biuq gvl sso jil la ,

Ddiul bul cheq tv seiq ;

Biuq gvl sso jil nee ,

Yeq sso yeq mil chee hual jerq .

Shee mei sal me mai mei jjuq bbee la ,

Ceel sal bbv sal keel ,

Ngvq sal haiq sal keel ,

Ai naq sal lei yu ,

Sal lei yuq yel bbeq .

Ggv shee jji me mai mei jjuq bbee la ,

Ngvq jji haiq jji cerl ,

Oq jji chu jji cerl ,

Sei seel yeq jji cerl yel bbeq .

Kee shee ssa me mai mei jjuq bbee la ,

Si keeq lol ssa bbei yel bbeq .

Sso jil yeq ggu mu ,

Mail lei aiq me ddaiq ;

Mil jil yeq nvl mei ,

Mail lei see me ddaiq .

Chee ddiuq bbei ceeq sseef gge ddiuq ,

Niuq mee niuq seel hei ,

Her tv lei leeq la ,

Her qil si li tv ,

Her tv sso goq zzerl ,

Sso ruq jju gvl ye ,

Mil ruq jju gvl ye .

Ruq mee ruq seel hei ,

Ruq tv lei leeq la ;

Mee ruq heeq nal ggee ,

Sso ee jji kuaq muq ,

Ggu chuq jil kuaq tiul ,

Gguq kua zzai bberq lvl ;

Kee bbe jjiq lei tvl ,

Laq ceil zzaiq lei rheq ,

Cer lei zzeeq me tal .

Chvl mee chvl seel hei ,

Chvl tv lei leeq la ;

Chvl mee ggv lo jju ,

Shu la lei shu dder ,

Pvl la lei pvl dder ,

Bbei lei sei me tal .

Cv mee cv seel hei ,

Cv tv lei leeq la ;

Bbei perq cee cee ggee ,

Ni perq req gv lvl ,

Ddiuq ku zzeeq koq yuq ,

Qil lei zzeeq me tal .

Yeq la chee ddiuq hiul me taq ,

Chee ddiuq zzeeq me ddu .

Biuq gvl sso jil nee ,

Ngv lv Yeq chel goq ,

Yeq chel yeq see goq ,

See goq ggeq bvl bbeq .

Yeq sso yeq mil tee ,

Ree perq zherl me see bbee la ,

Ddee zherl gguq ddee zherl ,

Ggeq lei bvl yel bbeq .

Yeq sso yeq mil la ,

Biuq ko mi yel laq ,

Biuq ko mi tal seiq .

El ni la sherl ni ,

Sso jil yeq nvl mei ,

Sso jerq me diail bbei ,

Mil gguq see tee la ;

Sso jil yeq ggu mu ,

Mil gguq tv seiq yil .

Mil ku siuq yi gge ,

Shel dder ni see ruq ;

Zil li perq ko beeq ,

Ko lei beeq me naiq ,

Sso jerq shel tal seiq .

Mil jil heiq nvl mei ,

Mil jerq me diail bbei ,

Sso gguq see tee la ;

Mil ggv li hua gel ,

Sso gguq tv seiq yil .

Sso ku yeq yi gge ,

Shel dder ni see ruq ;

Lei gaiq naq ko beeq ,

Ko lei beeq me naiq ,

Mil jerq shel tal seiq .

Ai shuaq hai nal zzerq ,

Mil nee la me haiq ;

Hai sheeq zhu ma lif ,

Sso nee la me lil ,

Kel pie ai pie lvl ,

Pie pieq zee ggeeq nee ,

Ni sso jjiq qil zzee ,

Ddee zzee ggv sei ye ,

Yeq zzeeq bie sei ye !

Go shuaq leil see pil ,

Me pil pi bbei nvq ;

Sso laq mil laq sherq ,

Sso kee mil kee ddu .

Mil kee ggeq lei lvq ,

Sso kee teiq lei tvl ,

Luq lei bbeeq tal seiq ;

Geeq tv gee mieq aiq ,

Mail lei aiq me ddaiq .

Chee ni biuq gvl sso jil nee ,

Sseiq biuq sseiq nee bvl ,

Bvl lei Bbe sheeq Ngv lv kee leel tvf ;

Yeq sso yeq mil nee ni gvl ,

Laq ceil dol lei daq ,

Mei jji teiq hiul bbei ,

Dol nie ddee liuq neiq .

Ree perq dol nie jjeq ,

Ree perq teiq liuq bbei ;

Sso ko el bbeeq lvl ,

Mil ko bbai ssi lvl ;

Lil li hua huaq neiq ,

Dol chual bbee tal seiq .

Chual lei Ngv lv so shuaq gv leel tvf ,

Sei seiq mei zeil gvq ,

Sso me gaq bbee la ,

Sso gaq yu yu bbei ;

Mil me xuq bbee la ,

Mil xuq yu yu bbei .

Er perq shu ye huq ,

Lei yuq gai lei ji ;

Ser sheeq ser derl mei ,

Meel sheeq haiq beil zer ,

Lei yuq gai lei ji .

Meel sheeq siuq bi liq ,

Meel sheeq kail kue kueq .

Lei yuq gai lei ji ;

Sseiq shuaq gv nee zzeeq ,

Sseiq hol ddiuq nieq liuq .

Ddee sei seiq neiq bul ,

Yeq chel yeq see goq .

See goq yeq gai jjeq ,

Luq lei bbeeq tal seiq .

Ddee lvl kee chee tv ,

Ddee wul neiq tal seiq ;

Ddee zzerq kee chee tv ,

Ddee piel muq tal seiq ;

Ngv lv Yeq chel goq ,

Yeq goq teiq mi hol .

Yeq zzee e zzee nee ,

Sso ko lil laq mei ,

Yeg sso waq ye zeel ;

Piel muq yil weq mei ,

Yeq mil waq seiq zeel .

Yeq ko wa beiq sso ,

La hiuq zzai rua sherq ;

Zeiq gv La luq mil ,

Chual perq zzai dderq sherq ,

Yeq zv lee zo waq .

Yeq zzee e zzee nee ,

Yeq bber tvl neiq zeel ,

Yeq bber loq neiq zeel ,

Yeq bber zzeeq lu zeel ,

Sso zv lee zo waq ,

Mil zv lee zo waq .

Yeq sso la hiuq zzai ,

Yeq mil chual perq zzai ;

Yeq chel ddiuq sso loq ,

Kee teeq me jil bbei ,

Luq lei bbeeq tal seiq .

Ngv lv Yeq chel goq ,

E cei mei tee goq ;

Yeq chel lv yuq goq ,

Lv naq qi chu ye ;

Toq mei lv jju la ,

Bbe mei zzerq me zzeeq ,

Teeq mei jjiq me yi .

Bber zeeq hal yi mvq ,

Bber lerl oq yi mvq ;

Sso nee me pieq shel ,

Tee goq zzeeq me taq .

Tee leel ggeq lei faiq ,

Ddee goq ggeq lei faiq ;

Ni goq mei tee goq ,

Ni goq leel tv nvl .

Yeq chel xul zzeeq goq ,

Xul piel qi chu ye ;

Bbe mei zzerq zzeeq la ,

Toq mei lv me jju ,

Teeq mei jiq me yi .

Bber zeeq hal ye mvq ,

Bber lerl oq ye mvq ;

Mil nee me bbaiq shel ,

Tee goq zzeeq me taq ,

Tee goq hiul me taq .

Ni goq ggeq lei faiq ,

Yeq chel yeq see goq ,

See goq leel tv nvl ;

Lee naq nv nei la ,

Yeq chel goq nee zzeeq ;

Shel gel lv la la ,

Yeq chel goq nee zzeeq .

To ceil bbel bbeq la ,

Yeq see goq nee zzeeq ;

Zzer siuq zzerq zeil tee ,

Yeq see goq nee zzeeq ,

Bba siuq bbaq zeil la ,

Yeq chel goq nee bbaq ,

Go shuaq jjiq qil la ,

Yeq see goq nee yi .

Yeq chel lv mei naq ,

Yeq see goq nee jjeq ;

Toq mei lv la jju ,

Bbe mei zzerq la zzeeq ,

Teeq mei jjiq la yi .

Bber zeeq me jjuq goq ,

Bber lerl me hal goq .

Tee goq leel tv nvl ,

Yeq sso yeq mil nee ni gvl ;

Yeq chel lv mei naq ,

Lv kee ddee da nee ,

Yeq zzee E zee nee ,

Sso miq wai nee ddv ,

Mil miq yiq nee ddv ,

Lv nieq ddv zo waq .

Yeq zzee e zzee nee ,

Ngv bbaq qer lei sso nieq chul ,

Haiq bbaq qer lei mil nieq guq ;

Sso jil wai laq sherq ,

Mil ji yiq laq sherq ,

See bul bbee zo waq .

See lei Yeq zzee e zzeef gge ,

Yeq goq leel tv nvl ;

Yeq zzee e zzee nee ,

Lee gel chee jjiq tvq ,

Shel gel chee ku sail ;

Gel tv si gua nee ,

Chu perq gul jjiq lal ,

To ceil lee nieq pvl ,

Sso bbaq teiq bbei zaq ,

Mil bbaq teiq bbei zaq .

Ngvq zhua yiq nee zol ,

Haiq zhua wai nee tvq ;

Ngvq zhua zzeeq la tal ,

Haiq zhua yil la tal .

Ngvq jer ree perq keel

Sso gai ji zo waq ;

Haig jer leil naq keel ,

Mil gai ji zo waq .

Meel sheeq kail kue kueq ,

Mil gai ji zo waq ;

Meel sheeq Siuq bi liq ,

Sso gai ji zo waq ;

Yeq sso bi liq muq ,

Yeq mil kue kueq kail tal seiq .

Yeq zzee e zzee nee ,

Ddee lerq dvq ko tvl ,

Ddee lerq xi ko tvl ;

Zzer ssee hoq ssee neiq ,

Dal ssee ssaiq ssee neiq ,

Ni bvl hal bvl bbee tal seiq .

Bberq mei no me waq ,

Laq ci jjiq lei dv me ddaiq ;

Bberq see erq me waq ,

Ko dvq erq lei see me ddaiq ,

Ssiul bul me waq mei ,

Ggu mu gguq lei bul me ddaiq .

Tee ddiuq la hiuq jil me tiul ,

Zzai rua bbei bee tal ;

Chual perq loq me ji ,

Leeq ee bbei tal seiq ;

Chual mei ssee me yel ,

No chaq bbee tal seiq .

No jjiq gai me yel ,

Ddai mei lvq kee bbei tal seiq ;

Ha liu me gul nee ,

Fv heeq juq aiq bbei tal seiq .

Ddee bbaq pvl mei nee ,

Ddee ssee zzee lei sei me tal ;

Ddee lvl cerl mei nee ,

Ddee ssee muq lei cheel me tal mei ddiuq yi gge ddiuq jjeq .

Cv mee cv seel hei ,

Oq herq jerl bu ko me gol ;

Cv ni perq nee siul ,

Bbal bba me ggeq mei gge ddiuq yi tee ddiuq waq .

Tee ddiuq jiq we so we gol nee hiul ,

Go shuaq so jjiq qil yi teeq leif aiq ;

Ruq mei ser gv haiq liu zzee lei faiq ,

Bvq mei ser ceil hai jiq teeq lei faiq .

Go lerq bbuq nee hiul ,

Gel juq ko yi mi lei faiq ;

La lerq bbuq nee hiul ,

So rerq ko yi mi lei faiq .

Ngv lv reeq ee chual perq lvl lei faiq ,

Chual mei hei baq no nil chaq lei faiq ;

Sso jil yeq ggu mu ,

Tee ddiuq zzeeq lei faiq ;

Mil ji haiq ggu mu ,

Tee ddiuq zzeeq lei faiq .

Mieq tal tee ddiuq liuq lei faiq ,

Hei tal tee ddiuq mi lei faiq ;

Yeq sso yeq mil nee ni gvl ,

Lei juq lei wul lee me ddu .

（选自和志武编译《Lv Bber Lv Ssaq》(鲁般鲁饶），云南民族出版社1987年版）

【附】

《鲁般鲁饶》前言

纳西拼音文《Lv Bber Lv Ssaq》由和志武编译，含《Lv Bber Lv Ssaq》《Yeq bee》《Cee Bvl Yeq Bvl》，云南民族出版社1987年7月出版。

Gai Shel Dder Gee Zheeq

《Lv Bber Lv Ssaq》tee,eq bbei sherl bbei gge, Ivl sso IvI mei sher shel neiq mei waq.“Lv”(wuq) tee bbv(yuq)Ivl see pei(sui) gge zherq wuq waq, ddee kvl mail dal jjeq bbee la, ggv na haddee kual me ddee; kvl pai ji xi zzeeq derl bbuq derl la, wu pieq wu dal da me zherq.Tee waq zee ggeeq nee, jjuq puq wuq puq yil, Iv we ceel lei zzeeq. Zaq bbei golnaiq vq. Bbv lvl see pei nvl mei kuaq, wuqsso wuq mil zaq me zherq; zzeeq derl bbuq derl kail, wu pieq wu zzv ddoq me zherq.Kai mei jjeq mil jl, wu zzv Zzeeq bbv yu leiq perq me ddoq; ko beeq ko cei yil,hu nee gaq seiq mei, mail gguq tv me ceeq. Kai mei jjeq mil ji, bbei lei perqme jju pil yil, jjuq ddo jer zee shee mei waq. Jjeq zee ggeeq nee shee, me mupil yil shee, ssei me hail bbei shee!《Lv Bber Lv Ssaq》nvl, wuq sso wuq mil jjeq ko teiq shel gge, Do bbaq tei ee jjaiq ggvddee cai waq.

《Yeq bee》chee beenvl, Yeq vq shee gge zzer bee waq. Gai nief xi yu tee, eq zee bbei yil Yeq vqshee dder lei? Ddee tvf mvq zeel yi, lee sui neif xi zzee cvq nee biq tvlngaiq. Jjeq sso teeq mil ha me ddee; sso ssiul chee laq nvl, meeq diul muq dee bi bbei dder, mi bbvq ha biegvl. Ni tv mei chee tv, kvl pai ji xi wu pieq wu dal da me tal, tee zee ggeeqnee Yeq vq ddu mei waq. Gai nief xi yu tee. jjeq dal jjeq pil bbeef, Yeq vq dolme tv; jjeq dal me ssaq bbei, wu pieq wu zzee shuq me zherq; eq bba mei nee keejjer ddee gvl teiq yel la, mil nee me bbeq shel me tal; mieq ggo ddee ggv teiqhaiq la, sso nee me ni shel me tal; xi yuq mu zo teiq me jju, shee pil tee neefbbiq zo mv bbei vq. Me mu Yeq vq shee, ssei me hail seiq nal: "Ngv lv Yeq chelgoq" shel gge tee goq, ddiuq loq sseiq nee jju ddu leiq? Jjeq gaq pil yilzaq bbeq mi sv ddv, yil mu gv nee zhel ddee ceeq neif niq dal waq, Yeq chel goqshel ddee goq jju me ddu.

《Cee Bvl Yeq Bvl》tee,yeq vq shee pil seif, Do bbaq ga shuq yil. Her la leeq keel gv, yeq sso yeq milggeq bvl neiq mei waq. Ddiuq loq xi tee shee pil seif, ser ddv lv ba seiq;“ oq hei"teiq me jju,“ceeq” la jjuq me ddu;“ cee bvl yeq bvl”tee. xi gge nvl mei ddeebbei neiq ggef mv, ddiuq loq ceeq shel ddee siuq teiq me jjuq, Ngv lv gv la Yeqchel goq shel ddee goq teiq me jju.

Eq yi eq zee bbei yil chee hu lei see dder?Jjeq sher me see mei, zaq seiq vq me ddu! Eq bbei sherl bbei wuq sso wuq miltee, seiq bbei jjeq ddu mei see naiq; gai nief kvl pai ji xi la,wu pieq wu zzvshuq me tal see naiq; tee hu see seif see, eq yi xi yuq zaq bbei gol neiq tee,laq ye heeq bbei bbei bul me ceeq chee merq vq tal mvq: la hal ga vq bbei, Shelhuil zv yil jail shef tee, chuq bbei ggeq tv zherq bbee zeel ga tvl naiq.

Lel jeq ddee tv nvl, gai nief gge Do bbaq teiee neif Zzer bee tee, gee zheeq jaif shel ee, zei zziu ssei weq leq, ddee zzer nee mei xi goq teiq daiq ggvq. El ggeeqeq yi Naq xi zzer bee la hal ggeq tv zherq bbee tee, chee loq nee la ddee huliu liuq so soq tal me ddoq.

《Lv bber Iv ssaq》nvl,la ciu wef gge Do bbaq ddeeq Hoq Fai svq zzv nee meil yel;《Yeq bee》 chee bee nvl, Meeq shual we nee We liukee tv gge, El nial Hoq Sul liaiq nee zzer ye；《Cee bvlyeq bvl》nvl. Ee kof Do bbaq ddeeq Hoq Seel quaiq neeberl mei waq. Eq yi xi mul chee svl gv bbei el ggeeq gai me jjuq seiq nal, taf ggeeqnee Naq xi weiq hual kee peel me zherq bei, jjeq jji gge sher nvl, lei mil zherq me ni, nee nieq telf yi naiq.

Hoq Zheel' v YiChee nee berl

1986.5.