各位老友记，今日我哋跟住老广，嚟睇下栖霞山三宝嘅第一宝——唐代明征君碑！
呢座矗立在栖霞古寺红墙门外西侧碑亭里面嘅石碑，全名叫做“摄山栖霞寺明征君之碑”。佢系唐高宗上元三年（即系公元676年）建立嘅，到而家已经有成1300几年历史喇。
“明征君”究竟系边个呢？佢就系南朝宋齐年间嘅著名隐士——明僧绍。当时朝廷几次请佢出山做官，都俾佢婉拒咗，所以大家尊称佢做“征君”。
明僧绍当年选择喺摄山隐居，起咗间栖霞精舍。到咗公元483年，明僧绍临终前就将栖霞精舍捐出。后来法度禅师就以呢度为基础，正式创立栖霞寺——呢个就系栖霞寺同栖霞山个名嘅由嚟啦。
而家我哋见到嘅呢块碑嘞，系明僧绍嘅第五代孙——明崇俨为咗纪念先祖，特登向唐高宗李治求返嚟嘅御碑。明崇俨精通方术，好受唐高宗同武则天嘅信任噶。
好啦，而家我哋一齐嚟欣赏下呢块碑嘅艺术魅力啦！
明征君碑分为碑额、碑身同碑座三部分。碑文系由唐高宗亲自写嘅，记载咗明僧绍嘅生平同埋齐、梁两代喺摄山开窟造像嘅史实。最难得嘅系，成篇2376字嘅碑文只系缺咗13个字，可见保存得几咁好。书写碑文嘅系当时嘅大书法家高正臣，而碑额“明征君碑”四个篆体字，就出自另一位书法名家王知敬之手。
大家睇下下面个碑座，个样好似只龟咁，其实佢系龙嘅第六个仔——霸下，又叫赑屃，天生就有神力，最擅长揹重嘢，系专门用嚟驮碑嘅。
而明征君碑最巴闭嘅地方，就系佢嘅材质啦！大家可以仔细咁睇下个碑面，系咪见到好多一粒粒嘅白色斑纹，好似一朵朵含苞待放嘅梅花呢？栖霞寺历代高僧都亲切咁叫佢哋为“梅花石”。呢啲“梅花”其实系2.8亿年前嘅海百合茎化石同中国孔珊瑚化石嚟㗎，呢种材质真系独一味㗎！！
据说，块碑正面就有超过22000个海百合茎化石，咁密集嘅化石分布，全世界都极之罕见。摸落去有种“穿越亿年”嘅质感，真系名副其实嘅“活化石级”国宝，架势十足！
企喺呢块穿越千年嘅御碑前面，我哋唔止感受到历史嘅厚重，更加深深咁领略到中华文化嘅博大精深。栖霞山因为红叶而出名，亦因为呢三宝而流芳百世。
咁问题嚟喇：你估下栖霞三宝嘅第二宝我会同你介绍乜嘢呢？欢迎大家喺评论区留言分享你嘅答案，亦都好期待你可以亲自嚟到栖霞山，探寻呢个千年之谜！
老广们，快啲过嚟“朗京嘿哈山”，唔睇就走宝啦！
（感谢 陈宇轩出镜、赵颖芯同学的粤语协助
）
编辑：蔡晖、校对：夏丹丹、审核：李惠
图文如需转载请注明来源“南京栖霞山（ID：njsqxs）”。如有其他问题请联系后台编辑，我们一定会及时审核处理。
